АКШнын президенти Дональд Трамп Газада ок атышпоо аракеттери ылдамдагандан кийин Израилдин премьер-министри Биньямин Нетаньяху менен эки күндүн ичинде экинчи жолу жолугушту.
Эки лидер шейшемби күнү Ак үйдүн Овал кеңсесинде бир сааттан ашык убакытка созулган жолугушуу өткөрүштү. Бул жолугушууга журналисттер катышкан жок. Дүйшөмбү күнү узакка созулган кечки тамактануу учурунда да сүйлөшүүлөр болгон. Бул Нетаньяхунун Трамптын экинчи мөөнөтү башталгандан бери АКШга үчүнчү жолу барышы болуп саналат.
Сүйлөшүүлөр Трамптын Жакынкы Чыгыш боюнча чабарманы Стив Виткофф Израиль менен Хамастын ортосундагы чечилбеген маселелердин саны төрттөн бирге азайганын айтып, жылыш болот деген үмүтүн билдирген учурга туш келди.
"Биз ушул жуманын аягына чейин 60 күндүк ок атышпоо келишимине жетишебиз деп үмүттөнөбүз. Барымтадагы он киши бошотулат. Тогуз адамдын сөөгү кайтарылат," - деди Виткофф министрлер кабинетинин жыйынында журналисттерге.
Нетаньяху шейшемби күнү Вашингтонго барардын алдында Израиль менен Хамастын ортосунда кыйыр сүйлөшүүлөрдү өткөргөн Катардын делегациясы Ак үйдүн жогорку даражалуу өкүлдөрү менен жолугушту. Аксиостун айтымында, Ак үй жолугушуу тууралуу комментарий берген жок.
Капитолийде мыйзам чыгаруучуларга кайрылган Нетаньяху Газадагы операциялар али бүтө электигин, бирок ок атышпоо боюнча сүйлөшүүлөр "жүрүп жатканын" айтты.
"Биз Газадагы ишибизди бүтүрүшүбүз керек. Бардык туткундарды бошотуп, ХАМАСтын аскердик жана өкмөттүк мүмкүнчүлүктөрүн жок кылышыбыз керек," - деди.
Нетаньяху АКШнын вице-президенти Ж.Д. Ванс, Өкүлдөр палатасынын спикери Майк Жонсон менен жолугушту жана шаршемби күнү Сенаттын лидерлери менен жолугушуу үчүн Конгресске кайтып барышы күтүлүүдө.
