"Focus Taiwan" басылмасы Тайвандын Санариптик иштер министрлигинин (MODA) Facebookтун башкы компаниясы Meta Platforms Inc. компаниясына жарнама берүүчүлөр тууралуу маалыматтын "ачык-айкындуулугунун жетишсиздигинен" улам 512 324 АКШ доллары өлчөмүндө айып салганын билдирди.

MODA Meta компаниясына акыркы 23 учурда жарнама берүүчүлөр тууралуу жетиштүү ачык-айкын маалымат бербегени үчүн айып салды. Жетекчилер компаниянын алдамчылык боюнча кылмыштуулукту алдын алуу мыйзамын сактабаганын айтышты, бул мыйзамга ылайык, жарнаманы берген же каржылаган адам же юридикалык жак тууралуу маалыматты ачыкка чыгаруу керек.

Бул Мeta компаниясынын ошол эле маселе менен Тайвандагы экинчи айып пулу. 22-майда компанияга 35 миң долларга жакын айып салынган.

Facebook Тайванда алдамчылык жарнамалардын негизги булагы катары каралып келет.

CommonWealth Magazine журналында 2024-жылдын аягында жарыяланган Глобалдык алдамчылыкка каршы альянстын сурамжылоосуна ылайык, тайвандык катышуучулардын 60%дан ашыгы Meta компаниясында алдамчылык билдирүүлөргө туш болгонун билдиришкен.

Meta 2024-жылдан бери текшерүү процессин күчөткөнүн жана текшерүүсүз жарнама жүргүзүүгө жол берилбей турганын билдирген, деп маалымдайт Focus Taiwan.

Компания 2024-жылы 146000ден ашык жарнама аккаунттарын жана 1.6 миллион алдамчылык жарнамаларын платформаларынан өчүргөнүн билдирди.

Meta ачыктыкты жогорулатууну улантат жана платформанын коопсуздугун жакшыртуу үчүн MODA жана Кылмыш иликтөө бюросу менен кызматташып жатканын айтты.

Меta компаниясына маселени чечүү үчүн 30 күн убакыт берилди, антпесе жаңы айыпка жыгылышы мүмкүн экени эскертилди.