Орусиянын Тышкы иштер министрлигинин басма сөз катчысы Мария Захарова Улуу Британияны Орусия менен Украинанын ортосундагы жаңжалдагы позициясынан баш тартууга чакырып, бул абал жаңжалды таптакыр жаңы деңгээлге көтөрүп жиберүү коркунучун жаратаарын билдирди. 

Москвадагы басма сөз жыйынында Мария Захарова Улуу Британия менен Франциянын Украинага ракета технологиясын берип "от менен ойноп" жатканын айтты. 

Дүйшөмбү күнү Улуу Британия Киевге Орусиянын аймагына терең сокку урууга жөндөмдүү "Storm Shadow" узак аралыкка учуучу канаттуу ракеталарын өндүрүүнү баштоо үчүн жашыруун технологияларга мүмкүнчүлүк берерин жарыялаган. 

Улуу Британиянын Коргоо министрлиги "Украина менен ийиндеш тураарын" жана Украинага "Орусиянын президенти Владимир Путиндин мыйзамсыз басып киришинен" коргонуу үчүн керектүү жабдууларды берүүгө чечкиндүү экендиктерин билдирген.