Түркиянын жана Европанын эң ири коргонуу, авиация жана космостук өнөр жай кластери болгон SAHA Стамбул тарабынан уюштурулган SAHA-2026 эл аралык коргонуу, авиация жана космостук өнөр жай жарманкеси Стамбул жарманке борборунда башталды.
Ачылыш аземине Улуттук коргоо министри Яшар Гүлер, өнөр жай жана технология министри Мехмет Фатих Кажыр, Коргоо өнөр жайы башкармалыгынын башчысы Халук Гөргүн, SAHA Стамбул төрагасы Халук Байрактар, Baykar төрагасы Селчук Байрактар жана көптөгөн өлкөлөрдөн жогорку даражалуу расмий адамдар катышты.
"Технологиябызды тынчтыктын жана коопсуздуктун кепилдиги катары көрөбүз"
Жарманкенин ачылышында сөз сүйлөгөн Коргоо өнөр жайы башкармалыгынын башчысы Гөргүн Түркиянын коргоо өнөр жайынын кубаттуулугу эл аралык деңгээлде мойнуна жаңы милдеттерди жүктөгөнүн белгилеп, сөзүн мындайча улантты:
"Түркиянын бул тема боюнча мамилеси ачык. Биз күчүбүздү башаламандыкка эмес, туруктуулукка кызмат кылууга жумшап жатабыз. Технологиябызды чыңалуунун куралы катары эмес, тынчтыктын жана коопсуздуктун кепилдиги катары көрөбүз. Бул түшүнүк менен акыркы 12 айда 185 өлкөгө коргонуу жана аэрокосмостук экспортто жалпысынан 10,5 миллиард долларга жетиштик. Жакында 11 миллиард доллардан ашып, Түркияны коргонуу жана аэрокосмостук экспортто дүйнөдөгү алдыңкы 10 өлкөнүн катарына кошууну максат кылып жатабыз".
Гөргүн жетишилген ийгиликтер президент Режеп Таййип Эрдогандын күчтүү эрки, стратегиялык мамилеси жана көз карашы, ошондой эле тынымсыз эмгек, инженердик мүмкүнчүлүктөр жана мекенге болгон сүйүүсүнө негизделгенин билдирди.
"Маанилүү технологияларда чет элдик булактарга көз карандылыкты жоебуз"
Халук Гөргүн: "Биз аанилүү технологияларда чет элдик булактарга көз карандылыкты жок кылабыз. Экспортубузду туруктуу түрдө өстүрөбүз. Компанияларыбыздын глобалдык атаандаштыкка жөндөмдүүлүгүн андан ары жогорулатабыз. Мамлекеттик сектордун, өнөр жайдын жана академиялык чөйрөнүн ортосундагы кызматташтыкты бекемдейбиз. Негизги подрядчылар менен чакан жана орто ишканалардын ортосундагы байланышты натыйжалуураак кылабыз. Адам ресурстарыбызды технологиялык максаттарыбызга ылайык өнүктүрөбүз. Бул максаттарга жетүү үчүн дос жана союздаш өлкөлөр менен ишенимге негизделген жаңы кызматташтыктарды өнүктүрүү өтө маанилүү", - деп билдирди.
Гөргүн Түркия коргоо өнөр жайында ишенимдүү, тажрыйбалуу жана узак мөөнөттүү ой жүгүрткөн өнөктөш экенин баса белгиледи.
