Шаршемби күнү Пекинде Орусиянын президенти Владимир Путин менен кытайлык кесиптеши Си Цзиньпиндин сүйлөшүүлөрүнөн кийин Орусия менен Кытай экономика, энергетика, транспорт жана эл аралык кызматташтыкты камтыган 20 документке кол коюшту.
Эки лидер Орусия менен Кытайдын ортосундагы өнөктөштүктү андан ары чыңдоо жана мамилелерди тереңдетүү боюнча биргелешкен билдирүүнү, ошондой эле көп полярдуу дүйнөнү жана жаңы типтеги эл аралык мамилелерди түзүү боюнча биргелешкен декларацияны кабыл алышты.
Си Цзиньпин менен жолугушуудан кийинки басма сөз жыйынында Путин Москва менен Пекин тышкы кысымдардан жана дүйнөлүк рыноктордогу өзгөрүүлөрдөн корголгон туруктуу эки тараптуу соода системасын түзгөнүн айтты.
Путин рубл жана юань менен соода жүргүзүү экономикалык кызматташтыкты "тышкы таасирлерден" коргоого жардам берерин жана эки өлкөнүн ортосундагы соода байланыштарынын туруктуулугун камсыз кылаарын түшүндүрдү.
«Орусия менен Кытайдын өз ара жана жалпысынан өлкөлөрүбүздүн ортосундагы төлөмдөрдү улуттук валюталарга которуу боюнча координацияланган кадамдары чоң мааниге ээ. Натыйжада Орусия менен Кытайдын экспорттук-импорттук операцияларынын дээрлик бардыгы рубль жана юань менен жүргүзүлөт», - деди ал.
Путин ошондой эле Орусия Кытайга мунай жана газ менен үзгүлтүксүз камсыздоону улантууга даяр экенин жана орусиялык «Росатом» атомдук компаниясы эки өлкөнүн ортосундагы кеңири энергетикалык кызматташтыктын алкагында Кытайдагы атомдук электр станцияларында жаңы энергетикалык блокторду курууну аяктап жатканын билдирди.
Орус лидери Орусия менен Кытайдын өнөктөштүгүн эл аралык мамилелердеги турукташтыруучу фактор катары да мүнөздөдү.
Путин ошондой эле эки тараптуу визасыз режимден алынган оң натыйжаларга көңүл бурду, бул эки өлкөнүн ортосундагы туризмди жана адамдардын өз ара аракеттенүүсүн күчөттү.
Путин: «2025-жылы Кытай Эл Республикасына 2 миллиондон ашык орусиялык жаран, ал эми Орусияга 1 миллиондон ашык кытайлык жаран барган», - деп билдирди.
