Министр Фидан НАТОнун Анкара саммитинин алдында «New York Times» (NYT) гезитине маек берди.

Министр Фидан Түркияда өтө турган НАТОнун Анкара саммитинин алкагында президент Эрдоган менен АКШнын президенти Трамптын ортосундагы жакын мамилелерди колдонуу аркылуу альянстын ичиндеги пикир келишпестиктерди жоюуга аракет кылышарын билдирди.

Эрдоган менен Трамптын ортосундагы мамилелер НАТОнун ичиндеги чыңалууну басаңдатууга жардам бере аларын белгилеген Фидан, бул Трамп үчүн ишеним жана достук маселеси экенин айтты.

Министр Фидан Түркия менен Европанын башка өлкөлөрүнүн ортосунда альянстын мааниси боюнча бирдиктүү пикирдин бар экенине көңүлдөрдү буруп: "НАТОнун зарылчылыгын эч ким талкуулабайт",- деди.

Европа Биримдигинин (ЕБ) ичиндеги коргонуу тармагындагы кызматташтыктын күчөшү Европа өлкөлөрүнүн НАТОнун алдындагы милдеттенмелерине каршы келбей турганын белгилеген Фидан, Түркия менен Европа бири-бирин өздөрүнүн жамааттык коопсуздугу үчүн өтө маанилүү деп эсептеши керектигин айтты.

Фидан: «Биз дагы Европанын бир бөлүгүбүз жана Европа аймагында чогулуп, өзүбүздүн коопсуздук платформабызды түзмөйүнчө, өзүбүздү эч качан толук коопсуз сезе албайбыз», — деди.

Министр Фидан АКШ менен Ирандын ортосунда кол коюлган өз ара түшүнүшүү меморандумуна токтолуп: «Саясий эрк жагынан алганда, эки тарап тең акыркы максаттарга жетүү боюнча абдан олуттуу турушат», — деген көз карашын бөлүштү.

Түркиянын Россия–Украина согушун токтотуу боюнча жаңы сүйлөшүүлөрдү өткөрүүгө даяр экенин белгилеген Фидан, бирок анын жакын арада ишке ашарын күтпөй турганын айтты.

Фидан Россия менен Украина сүйлөшүү жана келишимдерге кирүүгө даяр экенин айтты, бирок бул процесске АКШнын таасири жана катышуусу зарыл экенин баса белгиледи.