Израилдин Коргоо министри Исраэль Кац жекшемби күнү армияга Газа тилкесинде Палестиналык ХАМАС тобу колдонгон деп айтылган жер астындагы туннелдерди жок кылууга даярданууну буйруганын билдирди.
Кац социалдык тармактагы X платформасында бул иш-аракетти "барымтадагыларды кайтаруу фазасынан кийинки Израилдин негизги милдети" деп атап, аны "Израиль армиясы (IDF) түздөн-түз жана АКШнын жетекчилиги жана көзөмөлү астында түзүлө турган эл аралык механизм аркылуу" ишке ашырарын айтты.
Министрдин айтымында, туннелдерди жок кылуу — Газа тилкесин куралсыздандыруу жана ХАМАСты куралсыздандыруу боюнча ок атышууну токтотуу келишиминин "негизги мааниси" болуп саналат.
Трамптын тынчтык планы
АКШнын президенти Дональд Трамп шаршемби күнү Израиль менен ХАМАС анын 29-сентябрда сунуштаган 20 пункттан турган планын ишке ашыруунун биринчи фазасына макул болгонун жарыялады. Бул план Газа тилкесинде ок атышууну токтотуу, ал жакта кармалып турган бардык израилдик туткундарды 2000дей палестиналык туткундарга алмаштыруу жана Израиль күчтөрүнүн Газанын бардык аймагынан акырындык менен чыгып кетүүсүн камтыйт.
Газа тилкесиндеги ок атышууну токтотуу келишиминин биринчи фазасы жума күнү түш ченде күчүнө кирди. Израиль күчтөрү "сары сызык" деп аталган чекке акырындык менен чыгып кетүүнү аяктап, алмашуу процессине 72 сааттык убакыт терезесин ачты.
Пландын экинчи фазасы Газа тилкесинде ХАМАС катышпаган жаңы башкаруу механизмин түзүүнү, палестиналыктардан жана араб-ислам өлкөлөрүнүн аскерлеринен турган коопсуздук күчүн түзүүнү жана ХАМАСты куралсыздандырууну камтыйт.
2023-жылдын октябрынан бери Израилдин чабуулдары 67600дөн ашуун палестиналыктын өмүрүн алды, алардын көбү аялдар жана балдар, ал эми Газа тилкесин жашоого жараксыз абалга алып келди.
