Түркиянын тышкы иштер министри Хакан Фидан Болгарияга болгон сапары эки коңшу өлкөнүн ортосундагы байланыштардын бекемдигин жана кызматташтыкты өнүктүрүүгө болгон жалпы милдеттенмелерин тастыктаганын билдирди.
Бейшемби күнү Болгариянын борбору Софияга болгон сапарынан кийин социалдык медиа баракчасы аркылуу сүйлөгөн сөзүндө министр Фидан: "Cапарыбыз элдерибиздин ортосундагы бекем байланыштар азыркы учурду гана эмес, жалпы келечегибизди да калыптандырарын дагы бир жолу көрсөттү", - деди.
Түркиянын коңшусу жана өнөктөшү Болгария менен тарыхый, гуманитардык жана маданий байланыштары терең экенин белгилеген Фидан бул сапар эки тараптуу өнөктөштүктү жана аймактык кызматташтыкты андан ары бекемдей турганына чын жүрөктөн ишенерин билдирди. Министр Фидан кесиптеши Велислава Петрова-Чамова жана башка расмий жетекчилерге меймандостугу жана сапардын ийгиликтүү аякташына кошкон салымы үчүн ыраазычылык билдирди.
Стратегиялык багыттар боюнча кызматташтыкты тереңдетүү тууралуу билдирүү
Тышкы иштер министри Фидандын Болгариянын президенти Ильяна Иотова, премьер-министр Румен Радев жана тышкы иштер министри Петрова-Чамова менен болгон жолугушуулары эки өлкөнүн энергетика, транспорт, инфраструктуралык байланыш жана коргонуу өнөр жайы сыяктуу стратегиялык багыттардагы кызматташуусун мындан ары тереңдете аларын дагы бир жолу көрсөткөнүн айтты. Фидан: "Биз бул багытта биргелешип иштөөнү улантабыз", - деди.
Түркия кызматташтык жана координация агенттигинин (TIKA) жетекчиси болуп иштеген кезинен бери жакындан билген Болгариядагы түрк коомчулугунун мүчөлөрү менен кайрадан жолугушуудан кубанычта экенин билдирген Фидан мындан тышкары Болгарияда иш алып барган түрк ишкерлери менен да жолугушуп, алардын ишмердүүлүгүн жана кошкон салымдарына баа берүү мүмкүнчүлүгүнө ээ болушканын айтты.
"Мусулмандар үчүн билим жана акылмандык борбору"
2025-2026-окуу жылындагы София Жогорку Ислам Институтунун бүтүрүү аземине катышуу өзү үчүн чоң сыймык экенин баса белгилеген Фидан: "Келечекке карай өз ишенимин, инсандыгын жана маданий мурастарын сактаган бул жаштар менен жолугушуу бизге үмүт берди", - деди.
Тышкы иштер министри Фидан Түркиянын Болгария менен болгон мамилелерин өз ара урматтоонун, жалпы кызыкчылыктардын жана жакшы коңшулук мамилелердин негизинде мандан ары да өнүктүрүүгө чечкиндүү экендерин сөздөрүнө кошту.
