Пакистан менен Индия бир нече күнгө созулган учактар, ракеталар, дрондор жана артиллериялык чабуулдардан кийин толук жана дароо ок атышууну токтотууга макулдашты. Бул жаңылыкты күтүүсүздөн АКШ президенти Дональд Трамп жарыялап, эки өлкөнү "акыл-эстүүлүктү колдонгондугу" үчүн куттуктады.
Исламабад жана Жаңы Делиден расмий өкүлдөр Трамп ишемби күнү Truth Social тармагында жарыялаган билдирүүсүнөн бир нече мүнөт өткөндөн кийин бул окуяны ырасташты. Бул учурда ядролук куралга ээ эки коңшу өлкөнүн ортосундагы жаңжал толук масштабдуу согушка айланып кетүү коркунучунда эле.
Трамп: "АКШ ортомчулук кылган узак түнкү сүйлөшүүлөрдөн кийин, Индия жана Пакистан толук жана дароо ок атышууну токтотууга макулдашканын жарыялоо мен үчүн кубанычтуу. Эки өлкөнү акыл-эстүүлүктү жана чоң акылмандыкты колдонгондугу үчүн куттуктайм", – деп жазды.
Индиянын өкмөтүнүн тышкы иштер боюнча катчысы Викрам Мисри эки тарап тең "кургактагы, абадагы жана деңиздеги бардык ок атууну жана согуштук аракеттерди" GMT убактысы боюнча саат 11:30дан тарта токтоторун билдирди.
Пакистандын тышкы иштер министри Исхак Дар X платформасында: "Пакистан жана Индия дароо күчүнө кирген ок атышууну токтотууга макулдашты. Пакистан ар дайым аймактагы тынчтык жана коопсуздук үчүн аракет кылып келген, бирок өзүнүн эгемендүүлүгү жана аймактык бүтүндүгүн сактоодон баш тарткан эмес!" – деп билдирди.
‘Чектелген зыян’
Индия өкмөтүнүн бир булагы ок атышууну токтотуу эки тараптуу макулдашуу аркылуу ишке ашканын билдирди. "Индия менен Пакистан ортосундагы ок атышууну жана аскердик аракеттерди токтотуу түздөн-түз эки өлкөнүн ортосунда макулдашылды", – деп AFP агенттигине аты-жөнүн атагысы келбеген булак билдирди.
Ок атышпоо Пакистан өз аймагындагы түнкү рейддерге жооп иретинде Индиянын аба базаларына кол салгандан бир күн өткөндөн кийин түзүлгөн. Индиянын Аскердик Аба күчтөрүнүн башчысы Вёмика Сингх ишемби күнкү брифингде аба базаларына "бир нече жогорку ылдамдыктагы ракеталык чабуулдар" болгонун, бирок "жабдыктарга чектелген зыян келтирилгенин" айтты.
Пакистан Индияны өзүнүн үч базасын, анын ичинде борбор Исламабаддан 10 чакырымдай алыстыкта жайгашкан Равалпиндидеги бир базаны ракета менен бутага алды деп айыптады. Кашмирдин Пакистан башкарган бөлүгүнүн расмий өкүлдөрү түн ичинде Индиянын аткылоосунда 11 жайкын тургун набыт болгонун билдирди.
Эки коңшунун ортосундагы кагылышуу эки өлкөнүн ортосундагы акыркы ондогон жылдардагы эң катуу кагылышуу катары сыпатталууда. Өз ара кол салууларда 60тан ашуун жаран каза болду.
