Аймактык бийликтер шейшемби күнү билдиргендей, Украинада түнкүсүн жасалган чабуулдардан кеминде 20 адам каза болуп, 40тан ашууну жаракат алды.

Россия Запорожье облусуна сегиз жолу чабуул жасап, абакты бутага алды. Аскердик администрациянын башчысы Иван Федоров Telegram каналынан 16 адам каза болуп, 35нин жаракат алганын, өзгөчө мекемелердин кыйрап, айланасындагы үйлөрдүн зыян тартканын билдирди.

Аймактык өкмөт өкүлдөрү Днепропетровск облусундагы башка чабуулдарда каза болгондор менен жаракат алгандардын саны көп экендигин билдиришти. Ошол эле учурда аймактык аскердик администрациянын башчысы Сергей Лысак Telegram каналында Каменское шаарына ракеталык чабуул жасалып, эки адамдын каза болгонун, бешөөсүнүн жаракат алганын жана оорукананын зыян тартканын жарыялады.

Лысак Синельниковский районундагы дагы бир кол салууда бир адамдын каза болгонун, бир нече кишинин да жаралангандыгын билдирди. Дүйшөмбү күнү кечинде Великомихайливскадагы башка бир кол салууга байланыштуу Telegram баракчасынан: "75 жаштагы аял каза болуп, 68 жаштагы эркек киши жаракат алды жана жеке менчикке зыян келтирилди",- деп жазды.

Аймактын убактылуу губернатору шейшемби күнү Россиянын түштүгүндө Украинанын учкучсуз учуучу аппаратарынын чабуулунда бир адам каза болгонун билдирди.

Ростов облусунун убактылуу губернатору Юрий Слюсар Telegram баракчасынан: "Островский көчөсүндө унаа жабыркады. Тилекке каршы, ичиндеги айдоочу каза болду",- деп жазды.

Киев 2022-жылы чабуул башталгандан бери негизинен чоң өлчөмдө коргоого алынган аймактарда жаңы ийгиликтерге жетишкен Россиянын жайкы чабуулунун мизин кайтарууга аракет кылууда.

Дем алыш күндөрү орус армиясы аймактагы биринчи кыштакты басып алгандан бир нече жумадан кийин Днепропетровскидеги “Малиевка конушун бошоткондугун” жарыялады.

АКШнын президенти Дональд Трамп дүйшөмбү күнү Москвага Украинадагы кагылышууну токтотуу үчүн "болжол менен 10 же 12 күн" берди, болбосо катаал санкцияларга кабылышы мүмкүн экендигин билдирди.