Президент Режеп Таййип Эрдоган жума күнү 2023-жылдын 6-февралында Түркиянын түштүк облустарында катталган жер титирөөлөрдө каза тапкан жарандарды эскерүү үчүн билдирүү жарыялады.

Өлкөнүн тарыхындагы эң кандуу апаттардын бири болгон жер титирөөлөрдүн үчүнчү жылына карата жарыялаган кайрылуусунда Эрдоган мамлекет кыйраган шаарларды кайра куруу убадасын аткарганын билдирди.

Түрк NSosyal социалдык медиа платформасында бөлүшүлгөн билдирүүсүндө Эрдоган, үч жыл мурун 11 облуска таасир эткен эки жер титирөөдө каза тапкандарды Түркиянын эч качан унутпай турганын айтты.

Эрдоган: "Үч жыл мурун башыбыздан өткөргөн эки чоң жер титирөөдөн каза болгон бир туугандарыбызды унутпайбыз", - деди.

Өмүрүнөн айрылгандардын мурасын сактоо

Президент өкмөт каза тапкандардын мурасын сактоого жана кыйраган аймактарды кайра курууга убада бергенин баса белгиледи.

Эрдоган: "Алардын элесин жүрөгүбүздө жана акылыбызда ар дайым сактоого, аманаттарын коргоого жана жер титирөөдөн талкаланган шаарларды кайрадан курууга байланыштуу элибизге убада бергенбиз", - деди.

Президент: «Бүгүнкү күндө Кудайдын уруксаты менен бул кыйынчылыкты жеңдик; үч жыл сыякту кыска мөөнөттө шаарларыбызды кайра куруп, жандандырдык. Биз убадабызды аткардык» деп кошумчалады.

Эрдогандын билдирүүсүндө 2023-жылдагы кыйроолордун көрүнүштөрү, ошондой эле жаңы курулган турак жайлардын, инфраструктуранын жана коомдук жайлардын көрүнүштөрү камтылган видео да тиркелди.

Кахраманмараш облусундагы эки башка жер титирөө он миңдеген адамдардын өлүмүнө жана Түркиянын түштүгүндө чоң кыйроолорго алып келди.