Коммуникация башкармалыгы 7-8-июлда Анкарада Түркия тарабынан өткөрүлө турган НАТОнун мамлекет жана өкмөт башчыларынын саммитине карата Европадагы ар кандай союздаш өлкөлөрдүн борборлорунда иш-чараларды уюштуруп жатат. Мадрид, Париж, Лондон, Варшава жана Римден кийин Бельгиянын борбору Брюсселде жогорку деңгээлдеги катышуудагы программа уюштурулду.

Иш-чаранын алкагында Түркиянын НАТОдогу туруктуу өкүлчүлүгүндө басма сөз өкүлдөрү менен жолугушуу өттү. Маалымат жыйынында журналисттердин глобалдык конъюнктуранын НАТОго тийгизген таасири жана Түркиянын Анкарадагы НАТО саммитине карата күтүүлөрү боюнча суроолоруна жооп берилди.

Программа белгилүү инсандардын катышуусундагы панель менен уланды. Панелдин ачылыш сөзүн НАТОнун башкы катчысынын орун басары Радмила Шекеринска сүйлөдү. Хасан Калйонжу университетинин окутуучусу жана SETAнын улук изилдөөчүсү доктор Мурат Аслан алып барган панелде Түркия Улуу Улуттук Жыйынынын Улуттук коргонуу комиссиясынын төрагасы жана мурдагы Улуттук коргоо министри Хулуси Акар, Түркиянын НАТОдогу туруктуу өкүлү элчи Басат Өзтүрк, НАТОдогу операциялар боюнча башкы катчынын орун басары Буржу Сан жана Бельгиянын аба күчтөрүнүн стратегия боюнча директору генерал-майор Гарольд Ван Пи баяндама жасашты.

Панелге Брюсселде жайгашкан аскер жана дипломатиялык кызматкерлер, коопсуздук жана тышкы саясат боюнча адистер, окумуштуулар жана ой жүгүртүү борборлорунун өкүлдөрү болуп 150 адам катышты.

Панелде Түркия менен НАТОнун өзгөрүп жаткан эл аралык аренанын шартында өздөрүн кандай алып жүрөрү жана бул процессте Түркиянын НАТОго кошкон салымы тууралуу сөз болду.

Катышуучулар ошондой эле 2026-жылдын июль айында Анкарада өтө турган НАТО саммитинин күтүлүп жаткан жыйынтыктары, НАТОнун келечеги кандайча калыптана тургандыгы жана Түркиянын Европа коопсуздугундагы ролу боюнча көз караштарын бөлүшүштү.