Бириккен Улуттар Уюмунун Коопсуздук Кеңешинин мүчөлөрү шейшемби күнү Суданда уланып жаткан зордук-зомбулукка, өзгөчө Кордофан жана Дарфур аймактарындагы кырдаалга байланыштуу терең тынчсыздануусун билдирип, бардык тараптарды кагылышууларды дароо токтотууга чакырышты.
Билдирүүдө февраль айынын башынан бери Дүйнөлүк азык-түлүк программасына (WFP) таасирин тийгизген көптөгөн чабуулдар, жай тургундарга, жарандык инфраструктурага жана гуманитардык жардам кызматкерлерине, объектилерге жана мүлктөргө каршы кайталанган дрон чабуулдары тууралуу кабарлар кескин айыпталды.
Кеңештин мүчөлөрү гуманитардык жардам кызматкерлерине же алардын мүлкүнө багытталган «атайылап жасалган чабуулдар» согуш кылмышы катары каралышы керекетигин эскертип, бардык тараптарды эл аралык укуктун алкагындагы коргоо милдеттерин аткарууга чакырышты.
Мындан тышкары, мүчөлөр Кордофанда уланып жаткан чабуулдар жана кырдаалды туруксуздаштыруу аракеттери үчүн парамилитардык Ыкчам колдоо күчтөрүн айыпташты. Билдирүүдө Эль-Фаширдеги негизсиз камоолор, кагылышуулар учурундагы сексуалдык зомбулук, системалуу өлтүрүүлөр, массалык жер которуулар жана этникалык негиздеги куугунтуктар сыяктуу фактылар мисалга келтирилди.
Кеңештин мүчөлөрү кагылышуудан улам келип чыккан ачарчылык жана азык-түлүк коопсуздугунун өтө курчтугуна байланыштуу олуттуу кооптонууларын билдиришти. Гуманитардык жардамдардын тоскоолдуксуз жетүүсүнө жана жай тургундар үчүн коопсуз өткөөлдөрдү түзүүгө чакырып, ошондой эле ачарчылыкты согуш куралы катары колдонбоо керектигин баса белгилешти.
Кеңеш туруктуу ок атышпоо келишимине жетишүүнү жана судандыктардын өздөрүнүн жетекчилиги астында жүрө турган ар тараптуу, инклюзивдик саясий процессти алдыга жылдырууну артыкчылыктуу багыт катары баса белгиледи.
Кеңеш аймактык актерлордун, БУУнун жана эл аралык өнөктөштөрдүн гуманитардык ок атышпоону ишке ашыруу жана жарандык башкарууга карай ишенимдүү жолду колдоо боюнча координацияланган аракеттерин кубаттады. Ошону менен бирге, мүчөлөр бардык өлкөлөрдү кагылышууну ырбата турган тышкы кийлигишүүлөрдөн алыс болууга чакырышты.
Билдирүүдө: «Биз Судандын эгемендигине, көз карандысыздыгына, биримдигине жана аймактык бүтүндүгүнө болгон туруктуу берилгендигибизди дагы бир жолу кайталайбыз. Кеңештин мүчөлөрү Ыкчам колдоо күчтөрүнүн көзөмөлүндөгү аймактарда параллелдүү башкаруу органынын түзүлүшүнө каршы экендигин кайталашты», — деп айтылды.
