Исламабаддын расмий билдирүүсүнө караганда Пакистан жума күнү, Индиядан кайтып келген жарандарын өткөн айда Кашмирдеги кандуу кол салуудан кийин жабылган чек ара аркылуу кабыл алууга даяр экенин билдирди.
Пакистан Тышкы иштер министрлиги Индиянын пакистандык жарандардын визаларын жокко чыгаруу чечими "олуттуу гуманитардык көйгөйлөрдү" жаратканын белгиледи. "Ден соолугу начар көптөгөн бейтаптар дарылануусун аяктай албай Пакистанга кайтууга аргасыз болушту", – деп кошумчалады министрлик.
Индиянын башкаруусундагы Кашмирде 26 адамдын өмүрүн алган кол салуудан кийин өзөктүк куралы бар эки кошуна чек ара дарбазаларын жабышынан улам көптөгөн пакистандык жарандар Аттари-Вагах чек арасынын Индия тарабында калган.
Исламабад эгер Индия жетекчилери чек арадан өткөрүүгө уруксат берсе өз жарандарын кабыл алууга даяр экенин билдирди. "Вагах чек арасы пакистандык жарандар үчүн келечекте да ачык бойдон калат", – деп кошумчалады.
Ядролук куралга ээ эки коңшу өлкө Кашмирдеги белгисиз куралчан адамдар тарабынан жасалган кол салуудан кийин өз ара чараларды көрүштү. Алар чек араларды жана аба мейкиндигин жаап, бири-биринин дипломаттарын өлкөдөн чыгарып жиберишти. Индия ошондой эле Инд суу келишими деп аталган эки тараптуу суу бөлүшүү келишимин бир тараптуу токтотту.
