Air India компаниясына таандык Boeing 787-8 Dreamliner учагы бейшемби күнү түшкө жуук жерге кулаардан мурда жардам сурап сигнал берген жана өрттөнүү менен турак жай имараттарына урунган.
Ишемби күнү полициянын маалыматы боюнча, Индиянын түндүгүндөгү Ахмедабад шаарында болгон бул кырсыктан 279 адамдын сөөгү табылган. Бул 21-кылымдагы эң чоң авиациялык кырсыктардын бири катары катталды.
Жерге кулаган учактагы 242 жүргүнчү менен экипаждын ичинен бир гана адам аман калган. Учактын куйругу медициналык кызматкерлердин жатаканасынын ичинен сыртка чыгып калган. Жерде да кеминде 38 адам каза болду.
«Уулумду эки жылдан кийин биринчи жолу көрдүм, бул абдан сонун учур болду», - деди Анил Пател. Уулу менен келини учакка түшөр алдында ага күтүүсүз конокко келишкен. «Азыр болсо... эч нерсе жок», - деп көзүнө жаш алган аял: «Кудайдын буйругу болду», - деди.
Кара кутуну издөө
Кырсыкка кабылган жүргүнчүлөрдүн жакындары Ахмедабадда ДНК үлгүлөрүн тапшырып жатышат, айрымдары бул үчүн Индияга учуп келүүгө аргасыз болушту. Расмий каза болгондордун саны ДНК идентификациясы аяктаганга чейин такталбайт.
Air India компаниясы учакта 169 индиялык, 53 британиялык, 7 португалиялык жана 1 канадалык жүргүнчү менен 12 экипаж мүчөснүн болгонун билдирди. Каза болгондордун арасында жогорку даражалуу саясатчыдан баштап өспүрүм чай сатуучуга чейин түрдүү адамдар бар.
Жалгыз аман калган 40 жаштагы Вишваш Кумар Рамеш, ал кантип аман калганын түшүндүрө албай турганын айтты. «Башында мен дагы өлөм деп ойлогом, бирок көзүмдү ачып, тирүү экенимди түшүндүм», – деп билдирди ооруканадан Британиянын жараны Рамеш улуттук DD News телеканалына.
Авиация министри Рам Мохан Найду Кинжарапу жума күнү жасаган билдирүүсүндө учуу маалыматтарын жазуучу кара кутунун табылганын, мунун кырсыкты иликтөөгө «чоң жардам» берерин билдирди. Эксперттер учак жерден 100 метр (330 фут) көтөрүлгөндөн кийин эмне үчүн кулап кеткенин иликтөө үчүн экинчи кара кутуну издеп жатышат.
Америкалык учак өндүрүүчүсү Boeing Air India менен байланышта экенин жана "толук колдоого даяр экенин" билдирди. Окуя боюнча маалыматы бар булак, бул 787 Dreamliner учагы менен болгон биринчи кырсык экенин белгиледи.
