Испаниянын премьер-министри Педро Санчес, Иберия жарым аралында жашоону токтогудай абалга келтирген электр энергиясы үзгүлтүккө учурагандан кийин, Испаниянын электр тармагынын оператору өлкөнүн жарымына жакынын электр энергиясы менен камсыздоону калыбына келтиргенин, ал эми өлкөнүн калган бөлүгү шейшембиге чейин нормалдуу абалга келерин билдирди.

Дүйшөмбү кечинде бийлик электр үзгүлтүгүнүн себебин аныктай электигин жана эч бир гипотезаны четке какпай турганын Санчес телекөрсөтүү аркылуу билдирген.

Португалиянын премьер-министри Луис Монтенегро өлкөдө электр камсыздоосу жакынкы сааттарда толугу менен калыбына келтирилерин айтты. Иберия жарым аралын дээрлик бир күн бою каптаган чоң үзгүлтүккө карабастан, өлкөдөгү бардык мамлекеттик кызматтар иштеп жатканын белгиледи.

Монтенегро: “Биздин электр тармактарыбыздагы кеңири масштабдуу үзгүлтүк өлкөбүздүн сыртында, балким, Испанияда болгон кырдаалдан улам келип чыккан”, – деп басма сөз жыйынында билдирди.

Ошондой эле ал өлкө боюнча электр камсыздоосу “жакынкы сааттарда” толугу менен калыбына келтирилерин кошумчалады.

Европа Кеңешинин төрагасы Антонио Кошта учурда Испания менен Португалиядагы кеңири масштабдуу электр үзгүлтүктөрүнө киберчабуулдун тиешеси бар экенин тастыктаган далилдер жок экенин билдирди.

Антонио Кошта Испания жана Португалиядагы электр үзгүлтүгү боюнча Санчес жана Монтенегро менен телефон аркылуу сүйлөшкөнүн айтты. “Эки өлкөнүн электр тармактарын башкарган операторлору үзгүлтүктүн себебин аныктоо жана электр камсыздоосун калыбына келтирүү боюнча иштеп жатышат”, – деп ал X платформасында жазды. Ошондой эле, “азыркы учурда киберчабуулдун белгилери жок” деп тактады.

Дүйшөмбү күнү түш ченде Португалия, Испания жана Франция менен Испаниянын ортосунда жайгашкан Андорра микромамлекетинде электр жарыгы өчүп, Франциянын айрым бөлүктөрүнө да таасирин тийгизди.

Бийлик электр үзгүлтүгүнүн себептерин иликтеп жатат. Испаниянын Киберкоопсуздук боюнча улуттук институту да бул окуяга киберчабуулдун тиешеси бар-жогун изилдеп жатат.