Президент Эрдоган маалыматтарды сактоо жана эсептөө үчүн ири санариптик борбор боло турган Түркиянын биринчи гипермасштабдуу булут аймагын түзүү боюнча стратегиялык меморандумга кол коюлганын жарыялады.
Шейшемби күнү Анкарада өткөн TÜBİTAK (Түркиянын илимий-техникалык изилдөө кеңеши) жана TÜBA (Түркиянын Илимдер академиясы) 2025-жылдагы сыйлык тапшыруу аземинде сөз сүйлөгөн Эрдоган: "2028-2029-жылдары ишке кириши пландалган бул долбоор менен Түркия Европа, Азия жана Жакынкы Чыгыштын ортосунда санариптик көпүрө курат. Өлкөбүз аймактын маалымат борборуна айланат", - деди.
Эрдоган: "Биз илимдеги акыркы жетишкендиктерге кылдат байкоо салып, буларга маани берип, улуттук өзгөчөлүгүбүзгө гана тиешелүү пикирлер жана иштер менен келечегибизди курушубуз керек"деп кошумчалады.
Президент Эрдоган жасалма интеллекттен автономдуу системаларга, маалыматтарды сактоо жана иштетүү борборлорунан пилотсуз технологияларга чейин Түркия көптөгөн өлкөлөр суктанган демилгелерди жана долбоорлорду ишке ашырганын билдирди.
Эрдоган ошондой эле электрохимия жана катуу абал механикасынан эксперименталдык психологияга, RNA биологиясына, стоматологияга, неврологияга, тарыхка жана философияга чейинки ар кандай тармактарда эмгектерди жараткан бардык академиктерди куттуктады.
Сыйлык ээлери өлкөнүн ар бир аймагындагы университеттерден келгенин айткан Эрдоган бул ар кайсы шаарлардагы мекемелердин Түркиянын илимий кубаттуулугуна инновациялык салым кошуп жатканынын белгиси экенин маалымдады.
Түркиянын биринчи гипер масштабдуу маалымат борбору ноябрь айында Анкарадагы өнөктөштөр Turkcell жана Google Cloud тарабынан кол коюлган келишимдин алкагында ишке киргизилет.
Гипер масштабдуу булут аймагы бир нече маалымат борборлорунда ири эсептөө, сактоо жана тармактык кубаттуулукту камтып, өкмөттөргө жана ишканаларга маалыматтарды коопсуз сактоого жана санариптик кызматтарды кеңири масштабда иштетүүгө мүмкүндүк берет.
Түркиянын санариптик эгемендигин бекемдеген жана жасалма интеллект менен каржы технологиялары сыяктуу ылдам өнүгүп келе жаткан тармактарды колдогон бул долбоор, маалыматтардын коопсуздугун жана кечигүүнү жакшыртып, Түркияны аймактык технологиялык борбор катары көрсөтөт жана чет элдик инвестициялар менен жогорку нарктуу жумушчу күчүн өлкөгө тартат.
