АКШ менен Кытайдын тышкы иштер министрлери Малайзияда биринчи жолу бетме-бет жолугушат
Бул жолугушуу Марко Рубионун АКШнын мамлекеттик катчысы катары Азияга жасаган биринчи иш сапарынын алкагында, ошондой эле Трамптын бажы төлөмдөрү менен коркутуулары жана союздаштардын коргонуу каржылоосун көбөйтүүгө кысымы учурунда болот.
АКШнын мамлекеттик катчысы Марко Рубио менен Кытайдын тышкы иштер министри Ван И жума күнү Малайзияда соода, коргонуу жана башка маселелер боюнча чыңалган кырдаалдын шартында биринчи жолу бетме-бет жолугушуу өткөрүшөт.
Бул жолугушуу Түштүк-Чыгыш Азия мамлекеттери ассоциациясынын (АСЕАН) тышкы иштер министрлеринин Куала-Лумпурдагы жыйынынын алкагында өтөт деп билдирди The Washington Post.
АКШ менен Кытай АСЕАНга мүчө болбосо да эки өлкө тең Түштүк-Чыгыш Азиядагы мамлекеттер менен тыгыз байланыш түзүүгө аракет кылып келет. Бирок аймактагы көптөгөн өлкөлөр кайсы бир тарапты ачык колдоо темасында этият мамиле кылууда.
Мамлекеттик катчынын графигине караганда, Рубио менен Ван жума күнү кечинде сүйлөшүү өткөрүшөт.
Рубио бейшемби күнү Ванг менен өткөрө турган жолугушууда, Пекиндин Украинадагы согушта Орусияга колдоосун талкуулоону пландап жатканын билдирди.
Рубио Орусиянын тышкы иштер министри Сергей Лавров менен жолугушуусунан кийин дароо: "Кытайлар Орусиянын аракеттерин ачык колдоодо. Негизинен алар байкалмайынча орустарга мүмкүн болушунча жардам берүүгө даяр деп ойлойм" деди.
Республикачыл сенатор болуп турганда 14 жыл бою Кытайга каршы катаал позициясы менен белгилүү болгон Рубио 2020-жылы Бээжин тарабынан кара тизмеге киргизилген жана азыр да санкциялар тизмесинде турат. Ал Ван менен акыркы жолу быйыл январь айында мамлекеттик катчы кызматына киришкенден кийин телефон аркылуу сүйлөшкөн.