АКШнын президенти Дональд Трамптын атайын өкүлү Стив Виткофф, Орусиянын лидери Владимир Путиндин Украина менен "туруктуу тынчтык" келишимине ачык экенин кабарлады. Бул билдирүү, үч жылдан ашуун убакытка созулган согушту токтотуу максатында жүргүзүлгөн сүйлөшүүлөрдөн кийин айтылды.
Жума күнү Трамптын атайын өкүлү Стив Виткофф Санкт-Петербургда Путин менен жолукту. Бул жолугушуу январь айында Республикачыл лидер Ак Үйгө кайтып келгенден бери үчүнчү жолу өттү.
Виткофф дүйшөмбү күнү Fox News телеканалына берген маегинде, тынчтык келишиминин учурда “калыптанып жатканын” жана Путиндин эки негизги кеңешчиси Юрий Ушаков жана Кирилл Дмитриев менен “таасирдүү жыйын” өткөргөндөрүн айтты.
"Путиндин талабы - бул жерде туруктуу тынчтыкты орнотуу. Ошондуктан ок атышпоо маселесин да талкууладык. Бул абалга жетүү үчүн бизге бир аз убакыт керек болду", - деди Виткофф.
"Менимче, биз дүйнө үчүн абдан маанилүү нерсенин босогосунда турабыз," - деген Виткофф, Орусия менен АКШнын ортосундагы соода келишимдери да сүйлөшүүлөрдүн бир бөлүгү болгонун маалымдады.
"Менин оюмча, Орусия менен АКШнын мамилесин абдан таасирдүү коммерциялык мүмкүнчүлүктөр аркылуу өзгөртүүгө мүмкүнчүлүгүбүз бар. Бул аймакка туруктуулук алып келет деп ишенем," - деди ал.
Трамп Москва менен Киевди ок атышпоо келишимине макул болууга көндүрүүгө аракет кылып келет, бирок АКШ президенти орус жана америкалык расмий өкүлдөрдүн кезектеги сүйлөшүүлөрүндө олуттуу жылыштарды камсыздай алган жок.
Путин өткөн айда АКШ менен Украинанын согушту толук жана шартсыз токтотуу сунушун четке каккан. Ошол эле учурда Кремль Кара деңизде ыктымалдуу ок атышпоону Батыштын айрым санкцияларды алып салуу шартына байланыштырган.
