Түркия Республикасынын Тышкы иштер министрлиги, Грецияда 19-майда өткөрүлгөн айрым иш-чаралар жана билдирүүлөр боюнча жазуу жүзүндө билдирүү жарыялады.
Билдирүүдө төмөнкүлөр камтылды:
"Түркия Республикасынын негиздөөчүсү Улуу жол башчы Мустафа Кемал Ататүрк Самсунга келип, Грецияны кошо алганда, оккупациялык күчтөргө каршы улуттук күрөштү баштаган 1919-жылдын 19-майы түрк эли тарабынан "Ататүрктү эскерүү, жаштар жана спорт күнү" катары кубанычтуу белгиленет.
Греция 1994-жылы "Понт" дооматы боюнча улуттук деңгээлде кабыл алган мыйзамдары менен өлкөбүзгө каршы юридикалык жактан негизсиз дооматтарды коюп, бул негизсиз дооматтарды тартынбастан кеңейтип, Билим берүү министрлигинин жоболору аркылуу өлкөнүн жалпысында башталгыч жана орто мектептердеги балдарга сабак катары үйрөтүп жатат.
"Мегали идеясы" кыялын ишке ашыруу үчүн баштаган басып кирүү аракети ишке ашпай калган Греция өлкөбүзгө каршы негизсиз "Понт" дооматын күн тартибине коюп, жеңилүүсүн жана жасаган оор мыкаачылыктарын жашырууга аракет кылып жатат. Грек армиясы тарабынан жасалган кылмыштар жана мыкаачылыктар Союздаш мамлекеттердин иликтөө комиссиясынын отчетторунда жана Лозанна Тынчтык келишиминин 59-беренесинде жазылган.
Грек бийлиги саясий кызыкчылык үчүн тарыхты пайдаланууну токтотуп, 1821-жылдагы Триполи кыргынынан баштап түрктөргө жана башка этникалык топторго каршы жасалган кол салууларды, ошондой эле 1919-жылдын 15-майында Измирди басып алуу аракетинен башталып, Батыш Анадолудагы түрктөргө жана башка этникалык топторго каршы уланган кыргындарды эскериши керек.
Биз Грецияны чындыкты бурмалап тарыхтан душмандыкты жаратуунун ордуна, эки тараптуу мамилелерибизди тынчтыкта жана кызматташтыкта өнүктүрө турган ыкманы кабыл алууга чакырабыз".
