Орусиянын Амур облусундагы Амур газ-химиялык комплексинин курулуш аянтында чыккан өрттөн жети адам каза болуп, тогуз адам дайынсыз жоголду.

Комплекстин басма сөз кызматынын билдирүүсүндө кечээ чыккан өрт тууралуу маалымат берилди.

Билдирүүдө издөө-куткаруу иштеринин жүрүшүндө дагы төрт кытай жаранынын сөөгү табылганы, каза болгондордун саны жетиге жеткени, анын ичинде бир орусиялык жана алты кытай жараны бар экени кабарланды.

Подрядчик компанияда иштеген тогуз кытай жаранынын абалы болсо азырынча белгисиз, издөө-куткаруу иштери уланууда. Ошондой эле 152 адам медициналык жардамга кайрылып, ар кандай деңгээлдеги жаракаттар менен 36 адам ооруканага жаткырылганы белгиленди.

Билдирүүдө курулуш аянтындагы өрт өчүрүлгөнү жана жакын жердеги турак жайлардын абасындагы зыяндуу заттардын деңгээли жогорулабаганы айтылды.

Орусиянын "Сибур" жана Кытайдын "Синопек" компаниялары тарабынан курулуп жаткан Амур газ-химиялык комплекси дүйнөдөгү эң ири полимер жана газ-химиялык өндүрүш объектилеринин бири болот деп күтүлүүдө.