АКШнын президенти Дональд Трамп Американын абадан коргонуу ракеталарынын запастарынын азайышына байланыштуу кооптонуулардан улам Иранга каршы аскердик операцияларды күчөтүү планын токтотту.

The New York Times басылмасынын кабарына караганда, бул чечим Трамптын жума күнү жогорку мартабалуу кеңешчилери жана кабинет мүчөлөрү менен өткөргөн жыйынынан кийин кабыл алынды.

Аскердик жетекчилердин кеңири масштабдуу кагылышуулардын кайрадан башталышы, Жакынкы Чыгыштагы АКШ аскерлери менен базаларын коргоо үчүн зарыл болгон Patriot абадан коргонуу ракеталарын жана башка ок-дарыларды коркунучтуу деңгээлде азайтып жибериши мүмкүн экенин эскертишкендиги белгиленди. АКШнын Иран менен уланып жаткан кагылышууларда абадан коргонуу ракеталарынын запастарынын олуттуу бөлүгүн сарптаганы тууралуу кооптонуулар буга чейин да күн тартибине келген.

Дипломатиялык тоскоолдуктар

АКШнын башкы штабынын төрагасы, генерал Дэн Кейн кеңири масштабдуу аскердик операцияларды кайра баштоо мүмкүн экенин, бирок бул Жакынкы Чыгыштагы аскердик аракеттерди башкарган АКШ Борбордук командирлигинин карамагындагы ракета запастарын олуттуу түрдө азайтарын атайын сүйлөшүүлөрдө билдиргени маалымдалды.

Ак үйдүн коммуникация башкармалыгынын башчысы Стивен Чанг Трамп дипломатиялык чечимди ар дайым артык көрөрүн ачык айтып келгенин, бирок Иран Ормуз кысыгында же АКШнын өнөктөштөрүнө каршы "террордук аракеттерин" уланта берсе бардык варианттардын күн тартибинде каларын айтты.

Чанг : "Иран сүйлөшүү жолу менен келишим түзүүгө аракет кылганы акылдуулукка жатат. Болбосо, алар эмне болорун билишет",- деди.