Израилдин премьер-министри Биньямин Нетаньяхунун Коопсуздук кабинети Газа тилкесиндеги чабуулду акырындык менен кеңейтүү чечимин кабыл алды. Бул тууралуу дүйшөмбү күнү Израилдин коомдук телерадиосу Kan өз булактарына таянып билдирди.
“Израиль армиясы Газадагы чабуулун кеңейтүү максатында он миңдеген кошумча аскерлерди кызмат өтөөгө чакыра баштады”, деп билдирди башкы штабдын башчысы Эйал Замир.
Жекшемби күнү Йемендеги хуситтер тарабынан атылган ракетанын бир бөлүгү Израилдин негизги аэропорту Бен Гурионго жакын жерге түшкөндөн кийин Нетаньяху видеокайрылуусунда Газадагы согуштун “кийинки этабын” талкуулоо үчүн Коопсуздук кабинетин чогултканын жарыялады.
Израиль март айында АКШнын колдоосу менен түзүлгөн эки айлык ок атышпоону бир тараптуу бузуп, Газадагы чабуулдарын кайра баштаган.
Израилдин Ynet news сайтынын маалыматына караганда, Коопсуздук кабинети Газага жардам бөлүштүрүүнүн жаңы планын бекиткенин, бирок жардамдын аймакка качан келери белгисиз экенин билдирди. Ал эми БУУнун Жакынкы Чыгыштагы Палестиналык качкындарга жардам жана коомдук иштер боюнча агенттиги (UNRWA) жекшемби күнү Газадагы саламаттыкты сактоо кызматтары Израилдин блокадасы жана уланып жаткан чабуулдарынан улам олуттуу ресурс жетишсиздигине туш болгонун эскертти.
"Керектүү жабдуулардын үчтөн бири түгөнүп калды, дагы үчтөн бири эки айдын ичинде түгөнүшү мүмкүн", – деп билдирди агенттик X платформасында.
Агенттик медициналык кызматтар "өтө эле жетишсиз ресурстар менен" иштеп жатканын, бирок кризиске карабастан UNRWA Газада саламаттыкты сактоо кызматтарын көрсөткөн негизги мекемелердин бири бойдон калганын баса белгиледи.
