Түркиянын президенти Режеп Тайип Эрдоган АКШнын президенти Дональд Трамп менен өткөргөн телефондук сүйлөшүүсүн "абдан жемиштүү, кеңири жана чын ыкластуу" деп мүнөздөдү.
Эрдоган сүйлөшүүдөн кийин X платформасында "Бүгүн АКШнын президенти урматтуу досум Дональд Трамп менен өткөргөн телефондук сүйлөшүүм абдан жемиштүү, кеңири жана чын ыкластуу болду," деп маалымдады.
"Жакын арада досум Трамп менен жолугушам деп үмүттөнөм," деген Эрдоган бул жолугушуу "эки өлкө үчүн жакшы натыйжаларды алып келет" деген ишенимин билдирди.
Эрдоган эки өлкөнүн ортосундагы карым-катнаштарды өзгөчө коргоо өнөр жайы жана соода тармагында күчтөндүрүү үчүн өз ара эркти ырастагандарын айтты.
Эки лидер Түркия–АКШ эки тараптуу мамилелерди, аймактык жана глобалдык көйгөйлөр сыяктуу ар түрдүү темаларды талкуулашты.
Газадагы гуманитардык кризиске токтолгон Эрдоган, абалдын олуттуулугуна көңүл буруп, үзгүлтүксүз гуманитардык жардамдын зарылдыгына басым жасады.
Туруктуу тынчтыкка жетүү үчүн кызматташтык
Сүйлөшүү учурунда Эрдоган Трамптын жаңжалдарды токтотуу боюнча мамилесин колдой турганын билдирип, Иран менен сүйлөшүүлөрдү кайра баштоо аракеттерин жана Орусия–Украина согушун токтотууга багытталган демилгелерди кубаттады.
"Мен президент Трамптын дүйнө жүзүндөгү жаңжалдарды жана согуштарды токтотуу боюнча аракеттерине ыраазычылыгымды билдирдим жана аймагыбызда тынчтыкты, туруктуулукту жана коопсуздукту орнотуу үчүн Түркиянын зарыл болгон колдоону көрсөтүүгө даяр экенин баса белгиледим," деп кошумчалады.
"Мен урматтуу досумду эң жакынкы убакта Түркияда кабыл алууга кубанычта болорумду айттым, ал да бизди АКШга чакырды," деди.
Түркиянын Сириянын жеринин бүтүндүгүн коргоо жана өлкөдө ырааттуулукту камсыз кылуу чечкиндүүлүгүн кайталаган Эрдоган, АКШнын Сирияга карата санкцияларды жеңилдетүү аракетинин аймактык жана глобалдык тынчтыкка салым кошо ала турганын баса белгиледи.
Трамп да сүйлөшүүнү "абдан жакшы жана жемиштүү" деп мүнөздөп, Орусия менен Украинанын ортосундагы согушту токтотуу үчүн Түркиянын президенти менен иштешүүнү чыдамсыздык менен күтүп жатканын айтты.
