Украинанын тышкы иштер министри Андрей Сыбиха Анадолу агенттигине берген маегинде Орусия-Украина согушунда регионалдык стабилдүүлүктү сактоодо жана адилеттүү жана туруктуу тынчтыкты орнотууда Түркиянын ролу «өтө баалуу» деди.
Белек аймагында өткөрүлгөн Анталья дипломатия форумунда (ADF) Сыбиха: «Түркиянын жана өзгөчө президент (Режеп Таййип) Эрдогандын тынчтык аракеттериндеги ролу абдан маанилүү. Биз муну абдан баалуу деп эсептейбиз жана улана берет деп үмүттөнөбүз»,- деди.
Анкара менен Киевдин өзгөчө коопсуздук жана экономика тармагындагы күчтүү кызматташтыгына көңүл бурган Сыбиха : «Түркия-Украина карым-катнаштары утушка ээ болгон өнөктөштүк»,-деп өз баасын берди.
Түркиянын Кара деңиз дан демилгеси аркылуу азык-түлүк коопсуздугуна кошкон салымын баса белгилеген Сыбиха бул келишимдин Украина үчүн оң экономикалык таасирлерди жаратканын белгилеп, өлкөнүн Кара деңиз аймагындагы ролун «өтө маанилүү» деп мүнөздөдү.
Түркиянын туруктуу тынчтык үчүн колдоосуна токтолгон Сыбиха: «Биз адилеттүү, туруктуу, камтыган жана туруктуу тынчтыкты көздөйбүз жана Түркия сыяктуу өнөктөштөрдүн колдоосуна ишенебиз»,-деди.
Тышкы иштер министри белгилегендей, согуш башталгандан бери оккупацияланган аймактардын жарымы кайтарылып алынган, бирок 20 пайызы дагы эле оккупацияда турат.
Сыбиха Украинага согуштун бир күндүк чыгымын 220 миллион доллар деп эсептесе, Дүйнөлүк банктын маалыматы боюнча улуттук инфраструктурага келтирилген зыян 600 миллиард долларга жеткен.
«Келечекте ири масштабдуу реконструкция жана инвестициялык долбоорлор болот жана бул процессте түрк компанияларын көрүүгө ынтызарбыз», - деп кошумчалады ал.
Чыр-чатакка карабастан, Сыбиха үч-беш пайыздык экономикалык өсүш темпин, туруктуу инфляцияны жана Украинанын коргонуу өндүрүштүк кубаттуулугу алты эсеге өскөнүн белгиледи.
Сыбиха: «ADF жөн эле конференция эмес, биз эксперттерди угууга, пикир алмашууга, жаңы идеяларды жаратууга, маанилүү жолугушууларды өткөрүүгө жана келечектеги тенденцияларды түзүүгө ылайыктуу аянтча болуп калды»,-деди.
Сыбиха украин делегациясынын көптөгөн эл аралык кесиптештери, анын ичинде Африканын 11 өлкөсүнүн тышкы иштер министрлери менен жемиштүү сүйлөшүүлөрдү өткөргөнүн белгиледи. Анын айтымында, сүйлөшүүлөрдө Орусия-Украина согушу жана анын глобалдык таасири, өзгөчө Африка менен азык-түлүк коопсуздугу жаатындагы кызматташтык талкууланды.
Анталья дипломатия форуму Анадолу агенттигинин глобалдык байланыш өнөктөшү катары уюштурулду.
