Россия Улуу Британиянын же НАТОнун Калининград облусун блокадалоо аракетине ядролук курал жана бардык каражаттар менен жооп кайтарыларын эскертти.

Россиянын Лондондогу элчилиги Telegram аркылуу жарыяланган билдирүүсүндө британиялык басылмаларда НАТОнун Калининградды блокадага алышы же Россиянын аймактагы эгемендигин тааныбоо ыктымалдыгын талкуулаган кабарларга жооп берди.

Билдирүүдө: «Калининградды блокадага алуу же аймакка кол салуу пландарын жактагандар анын кесепеттери тууралуу жаңылышпашы керек. Британиянын же НАТОнун Россиянын аймагына каршы ар кандай аскердик аракеттерине ядролук куралдар жана Россиянын бардык мүмкүнчүлүктөрү менен жооп берилет», — деп айтылды.

Элчилик Россиянын «НАТО жана Европа менен чыр - чатакты каалабай турганын жана аларга кол салуу ниети жок экенин» кайталап, мындай кагылышууну баштагандар Россиянын жообу тууралуу «жаңылышпашы керектигин» белгиледи.

Россия өз аймагын коргоо үчүн бардык каражаттарды колдонууга даяр

Калининград — Балтика деңизинин жээгинде, Польша менен Литванын ортосунда жайгашкан, Россиянын негизги аймагынан Литва аркылуу бөлүнгөн аймак.

Өткөн аптада Париждеги Россиянын элчилиги да Анадолу агенттигине НАТО күчтөрүнүн Калининградга кол салуу же кирүүгө бөгөт коюу мүмкүнчүлүгүнө байланыштуу билдирүүлөргө жооп берген.

Элчилик: «Россия өз аймагын коргоо үчүн бардык мүмкүнчүлүктөрүн колдоно турганын баса белгилегибиз келет. Мындай пландарды ишке ашырууга жасалган ар кандай аракет сөзсүз түрдө күчтүү жооп менен коштолот», — деп билдирди.