Мексиканын президенти Клаудиа Шейнбаум АКШнын Венесуэлага аскердик кийлигишүүсүн жана президент Николас Мадуронун кармалышын айыптады. Латын Америкасына кандайдыр бир аскердик кийлигишүүгө каршы экенин билдирип, Мексика жерлерине окшош чабуулдун мүмкүн эместигин айтты.
Дүйшөмбү күнү эртең менен өткөргөн брифингде Шейнбаум Мексиканын чет элдик кийлигишүүнүн бардык түрлөрүн кескин түрдө четке кагарын билдирип, бул позиция Мексиканын Конституциясына гана эмес, Бириккен Улуттар Уюмунун Уставына да негизделгенин белгиледи.
Шейнбаум: "Биз башка өлкөлөрдүн ички иштерине кийлигишүүнү кескин түрдө четке кагабыз. Латын Америкасынын тарыхы ачык жана чындык бул- кийлигишүү эч качан демократияны алып келген эмес, эч качан гүлдөп-өнүгүүнү жараткан эмес жана туруктуулукту камсыз кылган эмес", - деди.
Мадуро жана анын жубайы Силия Флорес ишемби күнү АКШнын президенти Дональд Трамп Венесуэланын борбору Каракастагы бир нече буталарга абадан сокку урууга буйрук бергенден кийин уурдалган; Венесуэланын расмий өкүлдөрүнүн айтымында чабуулдарда кеминде 80 адам каза тапты.
Мексиканын тышкы иштер министри Хуан Рамон де ла Фуэнте да Трамптын администрациясынын аракеттерин сынга алып, БУУнун пассивдүүлүгүн айыптап, “БУУ бир тараптуу жана зордук-зомбулук аракеттерге каршы чечкиндүү чараларды көрө алган жок” деп билдирди. Ал: «Бириккен Улуттар Уюму дагы деле биздин негизги көп тараптуу органыбыз. Бул биздеги эң мыкты мекеме. Бирок тилекке каршы бүгүнкү күндө ал гегемондук державалардын кыянаттыктарын чектөөдө өзүн натыйжасыз көрсөттү. Эл аралык укуктун күнүмдүк бузулушун айыптаганга алсыз бойдон калууда», - деди.
АКШнын Венесуэлага кийлигишүүсүнөн кийин дароо эле Трамп Мексика жана Колумбия сыяктуу башка Латын Америка өлкөлөрүн потенциалдуу бута катары атап, алар эл аралык баңгизат аткезчилигинин борборлору деп айтты.
Мексикага байланыштуу Трамп аскердик кийлигишүү мүмкүнчүлүгүн кыйытып, Шейнбаум баңгизат картелдеринен «коркконун» жана бул картелдер өлкөдөгү чыныгы башкаруучу күч экенин баса белгиледи.
Басма сөз жыйынында Шейнбаум Венесуэладагы кийлигишүү сыяктуу ар кандай сценарийди четке кагып, «Басып кирүү болоруна ишенбейм. Менимче алар муну өтө олуттуу кабыл алышпайт», - деп билдирди.
Шейнбаум Трамп АКШнын аскерлеринин Мексикага кирүүсүнө бир нече жолу уруксат берүүнү сунуштаганын, бирок анын администрациясы бул сунушту кескин четке какканын айтты: "Биз абдан чечкиндүү түрдө жок дедик. Биринчиден өз эгемендүүлүгүбүздү коргоп жаткандыктан; экинчиден бул зарыл эмес болгондуктан", - деп түшүндүрдү.
