Түркиянын тышкы иштер министри Хакан Фидан бейшемби күнү жасаган билдирүүсүндө, президент Режеп Таййип Эрдогандын Газадагы коопсуздукту турукташтыруу жана аймакты калыбына келтирүү боюнча чечкиндүүлүгүнүн улантылып жатканын айтты.

Фидан бул тууралуу Вашингтондо АКШ президенти Дональд Трамптын жетекчилигинде чогулган Тынчтык кеңешинин алгачкы жыйынында билдирди.

Фидан : «Адамдардын эки жыл кыйынчылык тартуусунан кийин, АКШ президенти Дональд Трамптын жеке кийлигишүүсү жана биргелешкен аракеттерибиздин натыйжасында Газада ок атышууну токтотуу келишимине жетишилди», — деди.

Бирок министр гуманитардык абалдын дагы деле кооптуу экенин жана ок атышууну токтотуу режимин бузуулар уланып жатканын белгилеп, тез арада координацияланган жана натыйжалуу жооп кайтаруу зарылдыгын кошумчалады.

Фидан : «Президент Эрдоган Газанын коопсуздугун турукташтыруу жана калыбына келтирүүдөгү чечкиндүүлүгүн улантууда. Түркия ансыз да Газага чоң көлөмдө гуманитардык жардам көрсөтүп келе жатат», — деп кошумчалады.

Хакан Фидан: “Саламаттыкты сактоо жана билим берүү тармактарын калыбына келтирүүгө, полиция кызматкерлерин окутууга олуттуу салым кошо алабыз. Эл аралык турукташтыруу күчтөрүнө аскер жиберүүгө да даярбыз. Түркия адилеттүү жана узак мөөнөттүү тынчтыкка багытталган аракеттерди колдоону улантат. Мындай тынчтыктын пайдубалы эки мамлекеттүү чечим экенине ишенебиз. Аймактагы бардык элдердин пайдасына боло тургандай бул максатка карай бирдикте иштейли”,- деди.