ХАМАС куралдуу канаты болгон Кассам бригадаларынын жогорку даражалуу өкүлү Мухаммед Авденин Газа шаарында Израилдин соккусунан каза болгонун жарыялады.

ХАМАС шаршемби күнкү билдирүүсүндө Авденин шейшемби күнү кечинде Израилдин турак жайга жасаган соккусунан улам аялы жана эки уулу менен бирге каза болгонун билдирди.

Палестиналык каршылык көрсөтүү тобу Авдени "Кассамдын жогорку командири" деп мүнөздөп, анын "куралдуу каршылык көрсөтүү операцияларынын пайдубалын түптөгөн биринчи муунга" таандык экенин белгиледи.

Израиль армиясы шаршемби күнү эртең менен Газанын түндүгүндөгү соккудан Авдени өлтүргөнүн жарыялап, алнын кыска убакыт мурун ХАМАСтын куралдуу канатынын жаңы командири болуп шайланганын билдирди.

Израилдик маалымат каражаттары Авденин бул кызматка Иззеддин аль-Хаддаддын мындан кыска убакыт мурун өлтүрүлүшүнөн кийин дайындалганы тууралуу ырастоолорду да жарыялашты.

Израилдин премьер-министри Беньямин Нетаньяху жана коргоо министри Исраэль Кац шейшемби күнү армиянын Газа шаарындагы аба соккусунан Авдени бутага алганын билдиришти.

Израилдин билдирүүлөрү Газа шаарынын борборундагы калк жыш жайгашкан аймак Курман айт майрамынын алдында катуу бомбалангандан кийин келди.