Пакистан бийликтери жана жергиликтүү маалымат каражаттары Индиянын Пакистанга жасаган ракеталык соккусунан сегиз киши набыт болуп, 35 киши жараат алып, экөө дайынсыз жоголгондон кийин Пакистандын Аскердик Аба күчтөрү Индиянын Аскердик Аба күчтөрүнө таандык беш согуштук учагын атып түшүргөнүн кабарлашты.
Пакистандын коргоо министри Хаваджа Асиф Индиянын беш согуштук учагы атып түшүрүлгөнүн шаршемби күнү билдирди.
Асиф Bloomberg агенттигине: «Аскердик соккулар токтотулса, биз Индия менен сүйлөшөбүз. Биз мунун күчөшүн каалабайбыз. Бирок Индия баштаган душмандык аракеттер улана берсе, биз жооп беришибиз керек»,-деп билдирди.
Пакистан армиясынын басма сөз катчысы генерал-лейтенант Ахмед Шариф Чаудринин Reuters агенттигине билдиргенине караганда, Пакистан Индия колдонгон үч Рафале учагы, Сухой СУ-30 жана МИГ-29ду атып түшүргөн.
Индиянын өкмөттүк булактары Reuters маалымат агенттигине Индия башкарган Кашмирде үч согуштук учак кулаганын тастыктады.
Индиянын расмий өкүлү жаракат алган учкуч ооруканага жеткирилгенин билдирди.
Буга чейин Пакистандын маалымат министри Аттаулла Тарар TRT World телеканалына берген маегинде талаштуу Кашмирдин Ахноор тилкесинде бир учак, Индиянын Амбала шаарында дагы бир учак жана Индия башкаруусундагы Кашмирдин Жамму аймагында бир учкучсуз учуучу аппарат атып түшүрүлгөнүн айткан.
Пакистан армиясынын өкүлү Индиянын айрым коргонуу объектилери да жок кылынганын билдирди.
Индия Пакистандын дооматтарына азырынча жооп бере элек.
Индия башкарган Кашмирдин жашоочулары катуу жардырууларды угуп, ок-дарылардын кулап түшкөнүн көрсөткөн видеолорду бөлүшүшкөн.
Кашмирдин Индия башкарган Пулвама районундагы Вухан шаарында кыйраган согуштук учакты кайтарып жаткан индиялык жоокерлер тартылган видео социалдык медиада интернетке тарады.
Пахалгамдын чабуулунун жаңырыгы
Өзөктүк куралы бар эки кошуна өлкөнүн ортосундагы тирешүү 22-апрелде Индия башкарган Кашмирде согушчан деп шектелгендердин кол салуусунда 26 киши набыт болгондон кийин курчуп кеткен.
Индия эч кандай далил келтирбестен кол салуу үчүн Пакистанды күнөөлөп, «чек арадан өткөн» байланыштар бар деп доомат койду.
Пакистан бул айыптоолорду кескин четке кагып, калыс иликтөөнү талап кылды. Бирок Индия бул чакырыкты колдогон жок.
Кашмир 1947-жылдан бери Индия менен Пакистандын ортосундагы талаштын борборунда.
Козголоңчулар Индия башкарган Кашмирде 1989-жылдан бери козголоң чыгарып келет. Кашмирлик мусулмандардын көбү козголоңчулардын көз карандысыздык же Пакистанга кошулуу аракетин колдошот.
Индия коңшусу Пакистанды козголоңчуларды колдоп жатат деп көп айыптайт. Пакистан болсо Кашмирликтерге БУУнун Коопсуздук Кеңешинин резолюцияларында белгиленген өз тагдырын өзү аныктоо укугуна ылайык гана саясий, моралдык жана дипломатиялык колдоо көрсөтөөрүн билдирүүдө.
Индия кичинекей Гималай чөлкөмүнө 500 миңдей аскерин жайгаштырды.
Пахалгам чабуулунан кийин эки тарап тең жооп кайтаруу чараларын көрүштү.
Индия Пакистан менен болгон маанилүү Инд суу келишимин токтотту жана анын жалгыз иштеген кургактык чек арасын жапты. Ал жекшембиден тарта пакистандык жарандарга берилген визаларды жокко чыгарды.
Буга жооп кылып, Пакистан Индия жарандары үчүн визаларды жокко чыгарып, Индиянын авиакомпаниялары үчүн өзүнүн аба мейкиндигин жаап, коңшусу менен соодасын токтотуп, Индия менен болгон Симла келишимин токтоткон.
Бул 1972-жылкы келишим тынчтык орнотуу жана эки тараптуу талаш-тартыштарды чечүү, өзгөчө Кашмир талашына басым жасоо максатында түзүлгөн.
