АКШ биринчи жолу космоско курал-жарак жайгаштырганын жарыялагандан кийин Башкы штабдын башчысы генерал Дэн Кейн согушта жаңы доор башталганын жана америкалык күчтөр Жердин орбитасында гана эмес, Айдын айланасында да согушка даярданышы керек экенин билдирди.
Вашингтондо Аба, космос жана кибер конференциясында Кейн аскер кызматкерлерине жана өнөр жай өкүлдөрүнө АКШнын армиясы азыр "деңиз түбүнөн Айдын орбитасына чейин бардык жерде согушууга, туруштук берүүгө жана жеңишке жетүүгө даяр" болуу үчүн ыңгайлашышы керектигин айтты.
АКШнын армиясы Жердин жогорку орбитасы менен Айдын ортосундагы аймакта согушууга даяр деген билдирүү Аскер-аба күчтөрүнүн катчысы Трой Мейнк ошол эле конференцияда АКШ "орбиталык космосту башкаруу куралдарын" иштеп чыгып жатканын жарыялагандан кийин айтылды.
Аскер кызматкерлеринин космостук куралдар боюнча акыркы билдирүүлөрү космостун тынчтык максаттарда гана колдонулушу жана милитаризацияланбашы керек деген көп жылдык салттарга жана эл аралык түшүнүктөргө карама-каршы келет.
Космостук келишимге кол коюлган
АКШ менен Кытай тарабынан кол коюлган 1967-жылдагы Космостук келишимде Ай сыяктуу асман телолору тынчтык максаттарында гана колдонулушу керектиги, ядролук курал космоско жайгаштырылбай турганы жана өлкөлөр космостук объектилер келтирген зыян үчүн жооптуу экендиги белгиленген.
Эки жыл мурун АКШнын Орусия космостук куралды иштеп чыгып жатат деген билдирүүлөрүнөн кийин Бириккен Улуттар Уюмунда милитаризацияга каршы чараларды дагы да күчөтүү боюнча жаңы демилге көтөрүлгөн.
