Бейшемби күнү Израиль армиясы, Хизбулла менен уланып жаткан кагылышуулардан улам Ливандын түштүгүндө жашаган жарандарды Захрани дарыясынын түштүгүндөгү аймактардан чыгып кетүүгө чакырды.
X баракчасында жарыяланган билдирүүдө аскердик басма сөз катчысы Авичай Адрае армиянын катуу аба соккуларын улантаарын жана жайкын тургундардан "тез арада" чыгып кетүүнү суранганын билдирди.
"Абадан соккулар уланууда, армия аймакта бардык күчү менен операция жүргүзүүдө. Коопсуздугуңуз үчүн дагы бир жолу үйүңүздү дароо таштап, Захрани дарыясынын түндүгүнө барыңыз", - деди.
Авичай Адрае чабуулдар Хизбулланын ишмердүүлүгүнө багытталганын айтып, топтун мүчөлөрүнүн же объектилеринин жанындагы жайкын тургундар коркунучта болорун эскертти.
Адрае: "Хизбулланын согушкерлеринин, инфраструктурасынын же согуштук унааларынын жанында болгон ар бир адам өз өмүрүн тобокелге салып жатат", - деди. Ал дарыянын түштүгүндө калуу же түштүккө карай жылууга аракет кылуу карапайым тургундарга коркунуч келтириши мүмкүн экенин кошумчалады.
Ливан-Израиль сүйлөшүүлөрү
АКШнын президенти Дональд Трамп шаршемби күнү кечинде Израиль менен Ливандын лидерлери дээрлик отуз жылдан кийин биринчи жолу бейшемби күнү түз жолугушаарын айткандан кийин бул эскертүү берилди.
Бул билдирүү шейшемби күнү Тышкы иштер министрлигинде Ливандын элчиси Нада Хамада жана Израилдин элчиси Йехиел Лейтер катышкан жыйындан кийин жарыяланды.
Жыйынды тышкы иштер министри Марко Рубио жетектеди, ага АКШнын Ливандагы элчиси Мишель Исса, Тышкы иштер министрлигинин кеңешчиси Майкл Нидхэм жана АКШнын Бириккен Улуттар Уюмундагы элчиси Майк Уолтц катышты.
Жыйынга Хизбулла катышкан жок.
Ливан 2-мартта Жакынкы Чыгыш согушуна тартылган. Израиль менен АКШ Иранга каршы согуш баштап, Жогорку лидер Али Хаменеини өлтүрүшкөн, бул Хизбулланы Израилдин позицияларына ракета атууга түрткөн.
Ошондон бери Израиль Ливанга чабуулдарын күчөтүп, өлкөнүн түштүгүн басып алууну кеңейтти; Ливанда 2000ден ашык адам каза болуп, 1 миллиондон ашык адам жер которду.
