Дюжаррик БУУнун Нью-Йорктогу штаб-квартирасында өткөн күнүмдүк басма сөз жыйынында Жакынкы Чыгыштагы учурдагы жагдайлар тууралуу маалымат берди.

Газадагы гуманитардык кырдаалга көңүл бурган Дюжаррик: "Үй-бүлөлөрдүн болжол менен бештен бири күнүнө бир маал гана тамак жей алганы билдирилди. Үй-бүлөлөр күнүмдүк жашоосун камсыз кылуу үчүн күрөшүп жатышат жана бул үй-бүлөлөрдүн 50 пайызы өткөн айда кеминде бир жолу тамак-ашсыз калганы кабарланды", - деди.

Азык-түлүк абдан кымбат

Дюжаррик ошондой эле Дүйнөлүк азык-түлүк программасынын аймак боюнча отчетуна шилтеме жасап, ушул айга чейин Газадагы үй-бүлөлөрдүн төрттөн үч бөлүгү акча каражаттарынын жетишсиздигинен жана негизги азык-түлүктөрдүн кымбаттыгынан улам "базарларга жетүү кыйынчылыгына" кабылгандыгын маалымдады.

"Көпчүлүк азык-түлүк товарлары (Газада) 2023-жылы жаңжал күчөгөнгө чейинкиге караганда бир топ кымбат", - деген басма сөз катчы, аймакта иштеп жаткан гуманитардык жардам кызматкерлери коопсуздуктун начарлашына жана чектөөлөргө карабастан ишин улантууга аракет кылып жатышканын кошумчалады.