Израилдик туткундардын Газа тилкесинен бошотулушу эртең мененки саат 8:00дө (0500 GMT) Нецарим коридорунан башталып, андан соң саат 10:00дө Газанын Хан Юнус аймагында уланары күтүлүүдө, деп Израилдин маалымат каражаттары кабарлады.
Дүйшөмбү күнү Израиль эли кыйраган Газа тилкесинен акыркы 20 тирүү туткунду тосуп алууга даярданды. Бул окуя Тель-Авивдин Палестина тилкесине каршы эки жылдык согушунан кийин жетишилген ок атышууну токтотуу келишиминин негизги бөлүгү болуп саналат.
Ошол эле учурда палестиналыктар Израилдин абагында кармалып турган жүздөгөн адамдардын бошотулушун күтүшүүдө.
Бул окуя Египеттин Шарм-эль-Шейх шаарында өтө турган Газа тилкесиндеги ок атышууну токтотуу боюнча тынчтык саммитинин алдында болуп өттү. Саммитти АКШнын президенти Дональд Трамп жана Египеттин президенти Абдель Фаттах ас-Сиси биргелешип жетектешет.
Саммитке 20дан ашуун дүйнө лидерлери катышары күтүлүүдө. Алардын катарында Түркиянын президенти Режеп Таййип Эрдоган, Франциянын президенти Эммануэль Макрон, Иорданиянын падышасы Абдулла II, Бахрейндин падышасы Хамад бин Иса Аль Халифа, Улуу Британиянын премьер-министри Киир Стармер, Испаниянын премьер-министри Педро Санчес, Италиянын премьер-министри Жоржия Мелони, Пакистандын премьер-министри Шахбаз Шариф жана Германиянын канцлери Фридрих Мерц бар.
Египет саммиттин максаты “Газа тилкесиндеги согушту токтотуу, Жакынкы Чыгышта тынчтык жана туруктуулукту камсыз кылуу, ошондой эле аймактык коопсуздук жана туруктуулуктун жаңы этабын баштоо” экенин билдирди.
