Президент Режеп Таййип Эрдоган Сириянын борбор шаары Дамасктагы Мар Элиас чиркөөсүн бутага алган кандуу террордук кол салууну катуу айыптады.

Дүйшөмбү күнү X платформасындагы билдирүүсүндө Эрдоган: “Дамаскта жайгашкан Мар Элиас чиркөөсүнө жасалган бул жийиркеничтүү террордук кол салууну айыптайм,” – деп жазды.

Эрдоган каза болгондордун үй-бүлөлөрүнө, Сирия өкмөтүнө жана сириялыктарга көңүл айтты.

“Жаракат алгандардын тезирээк сакайып кетишин каалайм,” – деп кошумчалады.

Эрдоган бул чабуул Сириядагы жана жалпы аймактагы тынчтыкты, коопсуздукту жана биримдикти бузууга багытталганын баса белгиледи.

“Сириянын тынчтыгын, ички туруктуулугун жана биргелешип жашоо маданиятын бутага алган бул жийиркеничтүү террордук аракетке каршы биз Сирия эли жана өкмөтү менен биргебиз,” – деген Эрдоган Анкаранын Сирия өкмөтүнүн терроризмге каршы күрөшүн колдоону улантарын айтты.

Сириянын Саламаттыкты сактоо министрлиги, ДЕАШ террордук уюмунан бир жанкечтинин жекшемби күнү Дамасктын чыгышындагы чиркөөдө өзүн өзү жардыруудан мурда ок чыгарганын жана кеминде 20 кишинин каза болгонун, 52 кишинин жараланганын кабарлады.

Бул жардыруу Сириянын Ички иштер министрлиги 26-майда Дамасктын аймактарында ДЕАШ террордук уюмуна таандык жайларды аныктаганын жарыялагандан бир нече жума өткөндөн кийин болду. Коопсуздук күчтөрү операция учурунда жеңил жана орто калибрдеги куралдарды колго түшүрүшкөнүн маалымдады.

Асад режими кулатылгандан бери Сириянын коопсуздук күчтөрү кылмыштарга, адам укуктарын бузууга жана терроризмге байланыштуу иш-аракеттерге шектелген адамдарга каршы операцияларын улантып келет.

Сирияны 25 жылга жакын башкарган Башар Асад декабрь айында Орусияга качып, 1963-жылдан бери бийликте турган Баас партиясынын режими аяктаган.

Башар Асадды кулатуу үчүн режимге каршы күчтөрдү жетектеген Ахмед аш-Шараа январь айында өткөөл мезгилдин президенти болуп жарыяланган.