Тегеран аймактагы АКШнын активдерине жана мунай танкерлерине карата эскертүүлөрүн кеңейтүүдө. Иран тарап АКШнын акыркы чабуулдарына жооп иретинде Иорданиядагы Американын базасына ракета учуруп, эки эсминецке сокку урганын билдирди.
Иорданиянын аскердик өкүлдөрү Ирандан Американын базасын бутага алган 20 баллистикалык ракетанын 18ин абадан коргонуу системалары атып түшүргөнүн ырасташты. Калган ракеталар ачык аймактарга түшүп, адам өмүрүнө жана инфраструктурага зыян келтирген эмес.
Ирандын Ислам революциясынын сакчылар корпусу (IRGC) Иорданиядагы АКШ базасынан сырткары, круиздик ракеталар жана Aegis согуштук системасы менен жабдылган АКШнын DDG-119 жана DDG-53 эсминецтерине сокку урганын жарыялады.
Жарым-жартылай расмий «Tasnim» маалымат агенттиги жарыялаган билдирүүдө Ислам революциясынын сакчылар корпусу «Иран мунай танкерлерине жана кемелерине карата агрессияга» кайтарылган жооп экендиги ортого салынып, бутага алынган объектилерге олуттуу зыян келтирилгени маалыдалды.
Чек арадан тышкаркы ракеталык чабуулдар, Перс булуңундагы деңиз кагылышуулары күчөп жаткан мезгилде ишке ашууда.
Ирандын мамлекеттик телеканалы IRIB ырастагандай, Ирандын деңиз күчтөрү АКШнын Иран кемелерине кол салуусу тууралуу кабарлардан кийин, Кувейт жана Бахрейн портторундагы мунай танкерлерине сокку уруу менен жооп кайтаруу коркунучун жарыялап, экипажды дароо эвакуациялоого чакырды.
