Президент Режеп Таййип Эрдоган EFES-2026 машыгуусунда сүйлөгөн сөзүндө Измир шаарында өтүп жаткан бул иш-чара Түркиянын гана эмес, дүйнөнүн эң ири биргелешкен жана комплекстүү машыгууларынын бири экенин баса белгиледи. Мамлекет башчысы үстүбүздөгү жылдагы машыгууга түрк аскерлери менен бирге 50 башка өлкөдөн 1300дөн ашуун дос, бир тууган жана союздаш мамлекеттердин өздүк курамы катышып жатканын маалымдады.
Машыгууда колдонулган ата мекендик коргоо өнөр жай продукцияларына көңүл бурган президент: "Жогорку технологиялуу, ата мекендик жана улуттук коргоо өнөр жайыбыздын өндүрүмдөрү ийгиликтүү колдонулган бул иш-чара пландалышы, аткарылышы, аскердик бөлүктөрдүн шайкештиги жана анын артындагы стратегиялык акыл менен жөн гана машыгуу болуудан абдан терең маанини туюнтат. Бул жерде коркутуудан тышкары тынчтыкты орнотуу үчүн кандай даярдык, эрк жана чечкиндүүлүктү талап кыларынын үлгүсү бар.”
Эрдоган бүгүнкү күндө дүйнөдө жаңы тең салмактуулуктар жана альянстардын түзүлүп жатканын, бирок "жаңы глобалдык тартип али орной электигин" билдирди. Президент: "Дүйнөбүз бир ууч ири державалар тарабынан иштелип чыккан статус-кводон көп полярдуу, көп актердук түзүмгө тездик менен өнүгүп жатат", - деди.
«Бул татаал географиялык шартта армиябызды күчтүү жана жакшы жабдылган абалда кармап, тынчтыкты жана коопсуздукту коргоо керектигин билебиз», - деген Эрдоган, Түркиянын аймактагы ролуна көңүл буруп: «Түркия катары биз согушка жана башаламандыкка инвестиция салгандарга каршы тынчтыкты жана туруктуулукту коргоону улантабыз. Газада, Ливанда жана аймагыбыздын башка бөлүктөрүндө эркектерди, аялдарды, балдарды жана карыларды өлтүргөн геноциддик тармактарга каршы бүткүл адамзаттын жалпы баалуулуктарын чечкиндүү түрдө коргоону улантабыз».
