АКШнын согуштук кемеси Тринидад жана Тобагого кирди
АКШнын сенатору Рик Скотт Венесуэланын президенти Николас Мадуронун "күндөрү саналуу" экенин эскертти, ал эми Каракас АКШнын кемелеринин Венесуэланын жанына жайгашуусун "душмандык провокация" деп айыптады.
Трамптын администрациясы Венесуэлага аскердик кысымды күчөтүшү менен бирге жекшемби күнү АКШнын бир согуштук кемеси Тринидад жана Тобагонун борборуна жетти. АКШ сенатору Рик Скотт Венесуэланын президенти Николас Мадуронун "күндөрү саналуу" деп билдирди.
USS Gravely башкарылуучу ракеталык эсминеци Порт-оф-Спейнге токтоп, USS Gerald R. Ford учак ташуучу кемеси менен бирге Венесуэланын сууларына жакындады.
Мадуро бул аракетти айыптап, АКШны өз элине каршы “жаңы түбөлүктүү согушту” тутандырууга аракет кылып жатат деп күнөөлөдү.
Венесуэла өкмөтү да USS Gravely кемесинин болушун “Венесуэлага каршы душмандык провокация жана Кариб аймагындагы тынчтыкка олуттуу коркунуч” деп мүнөздөп, АКШны жалган чабуул уюштурууну пландап жатат деп айыптады.
Өкмөт өз билдирүүсүндө “Венесуэла АКШнын чалгындоо агенттиги ЦРУдан түз маалымат алып Тринидад жана Тобагонун сууларынан же Венесуэла аймагынан жалган чабуул даярдалып жатканын аныктаганын билдирет,” деп айтты.
Тринидад жана Тобаго менен АКШнын расмий өкүлдөрү, согуштук кеме бейшембиге чейин борбордо калаарын жана эки өлкө биргелешкен машыгуу өткөрөрүн жарыялашты.
‘Эгер мен Мадуро болсом, Орусия же Кытайга кетмекмин’
Ошол эле учурда АКШ сенатору Рик Скотт Венесуэла президенти Николас Мадурого өлкөдөн чыгып кетиши керектигин айтып, анын бийликтеги убактысы чектелүү экенин эскертти.
Флоридадан шайланган республикачыл сенатор Скотт CBS телеканалына берген маегинде “Эгер мен Мадуро болсом, азыр Орусия же Кытайга жөнөмөкмүн,” деди. Скотт Мадуронун “күндөрү саналуу” экенин билдирди.
АКШ Венесуэлага басып кирүүгө даярданып жатабы деген суроого Скотт “Мен андай деп ойлобойм” деп жооп берди.