Nvidia компаниясынын башкы директору Женсен Хуанг Кытай жаңы муундагы жасалма интеллектти өнүктүрүү жарышында "жеңишке жетет" деп билдирди жана Вашингтонду бул багыттагы аракеттерин тездетүүгө чакырды.

АКШда жайгашкан чип гиганты Nvidia компаниясынын башкы директору Financial Times гезитине Бээжиндин энергетикалык субсидиялары жасалма интеллект технологиясын колдогон өнүккөн жарым өткөргүчтөрдү өндүрүү аракеттерин күчөтүп жатканын айтты.

Британ гезити шаршемби күнү Лондондо өткөн иш-чарада Хуангдын: "Кытай жасалма интеллект жарышында жеңет", - деген сөзүн жарыялады.

Хуанг Nvidia компаниясынын X платформасындагы билдирүүсүндө "Мен көптөн бери айтып келе жатканымдай, Кытай жасалма интеллект боюнча Америкадан бир нече миллисекунд артта", - деп кошумчалады.

Калифорнияда жайгашкан Nvidia өткөн жумада дүйнөдөгү биринчи 5 триллион долларлык компания болду. Бирок анын рыноктук баасы андан бери 4,7 триллион долларга чейин төмөндөдү.

Жасалма интеллект системаларын үйрөтүү жана иштетүү үчүн колдонулган жогорку деңгээлдеги Nvidia чиптери учурда АКШнын улуттук коопсуздук тынчсыздануулары жана Кытай өкмөтүнүн тыюу салууларынан улам Кытайда сатылбайт.

Жасалма интеллектке карата "шек саноо"

Ак үй ушул аптанын башында Nvidia компаниясынын өзүнүн өнүккөн Blackwell чип моделин Кытайда сатууга дагы деле уруксат берүүгө даяр эместигин билдирди.

АКШ бул тыюунун себебин Кытайга аскердик артыкчылык берүү коркунучу менен түшүндүрдү.

Хуанг Вашингтонду бир нече жолу Nvidia чиптерин экспорттоого карата чектөөлөрдү жеңилдетүүгө чакырып, бул саясат Кытайдын өз технологиясын өнүктүрүүсүнө гана жардам берерин айтты.

Шаршемби күнү Financial Times гезитине берген маегинде Хуанг АКШнын штаттары тарабынан жасалма интеллектке киргизилген жаңы эрежелерди сынга алып, Кытай өкмөтү технологияны колдоо үчүн электр энергиясын субсидиялап жатканын белгиледи.

Хуанг АКШ жана Британия сыяктуу Батыш өлкөлөрү жасалма интеллектке карата "шек саноодон" улам артта калганын айтты.