Жума күнү Москванын жанында токтоп турган унаага коюлган жардыруучу зат жарылып, орусиялык башкы генерал набыт болду. Өлкөдөгү ири кылмыштарды иликтөөгө жооптуу Тергөө комитети окуяга байланыштуу адам өлтүрүү фактысы боюнча иликтөө иштери башталганын билдирди.
Бийлик өкүлдөрү, каза болгон адамдын Орусиянын Башкы штабындагы негизги операциялык башкармалыктын башчысынын орун басары генерал-лейтенант Ярослав Москалик экенин аныкташты.
Тергөөчүлөр Москванын чыгышындагы Балашиха кыштагында Фольксваген Гольф үлгүсүндөгү унаа көп кабаттуу үйдүн алдында жарылып кеткенден кийин адам өлтүрүү жана жардыруучу зат аткезчилиги боюнча иликтөө иштерин баштаганын билдиришти.
Социалдык тармактарга тараган көрүнүштөрдө унаанын толугу менен күйүп кеткенин көрүүгө болот.
Agentstvo иликтөөчү жаңылыктар сайтынын маалыматына ылайык, Москалик Балашиха шаарында жашаган, бирок жарылган унаа ага катталган эмес.
“Известия” гезити жарыялаган коопсуздук камерасынын видеосунда чоң жарылууну жана унаа сыныктарынын абага чачырап кеткенин көрүүгө болот. Жарылуу, бир адам унааны көздөй бара жаткан учурда болгон.
Тергөөчүлөр “Жардыруу, максималдуу зыян келтирүү үчүн металл сыныктары менен толтурулган колго жасалган жардыргыч заттын ишке киришинен улам болду” дешти.
Расмий орус булактарынын маалыматына караганда, Москалик 2015-жылы украин аскерлери менен Орусия колдогон жикчилдердин ортосундагы кагылышуу учурунда "Нормандия форматы" сүйлөшүүлөрүндө Орусиянын аскерий өкүлү болуп иштеген.
Орусиянын президенти Владимир Путин аны 2021-жылы генерал-лейтенант наамына көтөргөн.
Бул жарылуу Москванын Украинадагы аскердик операцияларына тиешеси бар адамдарга жасалган мурунку чабуулдарга окшош сыяктуу.
Киев буга чейин айрым кол салуулар үчүн жоопкерчиликти мойнуна алган, бирок жума күнкү окуя боюнча комментарий бере элек.
