Европа Биримдигинин (ЕБ) тышкы иштер жана коопсуздук саясаты боюнча жогорку өкүлү Кая Каллас Палестина аймактарын басып алган Израилдин конуштарында өндүрүлгөн товарларды импорттоого тыюу салуу "принципиалдуу позиция" болорун билдирди.
Айрым Батыш өлкөлөрүнүн, Палестина аймактарын басып алган Израилдин конуштары менен соода кылууга тыюу салуу чечиминен кийин The Irish Times гезитине берген маегинде Каллас мындай тыюу салууну кабыл алуу үчүн ЕБнин бардык 27 мүчөсүнүн бир добушу эмес, квалификациялуу көпчүлүктүн добушу жетиштүү болорун айтты.
ЕБнин тышкы иштер министрлеринин арасында Израилдин кеңейтилген конуштары эл аралык укукка каршы келет деген кеңири макулдашуу бар экенин билдирген Каллас Орусиянын Крымды аннексиялоосуна каршы позициясына шилтеме кылды.
Каллас: "Крым басып алынганда мунун мыйзамсыз жана таанылбай турганы темасында биздин позициябыз абдан ачык эле. Бул жерде да ушундай эле принципиалдуу позицияны көрсөтүшүбүз керек", - деди.
Оккупацияланган Палестина аймактарындагы конуштар мыйзамсыз экендиги жөнүндө жалпы макулдашуу бар экенин баса белгилеген Каллас бул аймактар менен соода жүргүзүүнү токтотуу керектигин айтты.
8-сентябрда Европа Биримдигинин мүчөлөрү Франция, Дания, Финляндия, Ирландия, Польша, Португалия, Испания, Швеция, ошондой эле Норвегия, Исландия, Канада жана Улуу Британия Палестина аймактарын оккупациялаган Израилдин конуштары менен соода жүргүзүүгө тыюу салуу боюнча биргелешкен чечим кабыл алганын жарыялашкан.
Соода санкцияларына жооп катары Израиль оккупацияланган Чыгыш Кудстагы Британ консулдугун жабуу чечимин билдирген.
