Түндүк Корея согуштан улам жумушчу күчүнүн жетишсиздигинен жапа чегип жаткан Орусияга миңдеген жумушчуларды жөнөткөндүгү жана бул жумушчулардын айрымдары Украинанын чабуулдарына кабылган объектилерде иштегендери айтылууда.
Wall Street Journal гезитинин кабарында Түндүк Корея акыркы жылдары мамилелерин чыңдоонун алкагында Орусияга жоокерлерди жана аскердик техникаларды жөнөткөн деген айтымдардан кийин согуштун себебинен жумушчу күчүнүн жетишсиздигинен жапа чегип жаткан өлкөгө жумушчуларды да жөнөткөндүгү айтылды.
Кабарда Орусиянын эң ири электрондук коммерция компанияларынын бири Wildberriesке таандык 20га жакын кампа жай мезгилинде Украинадагы чабуулдарга кабылганы жана жабыркаган айрым объектилерде түндүк кореялык аялдардын иштегени билдирилди.
Ошондой эле кабарда Түндүк Кореяга киргизилген санкциялардын бузулушун көзөмөлдөгөн Көп тараптуу санкцияларды көзөмөлдөө тобунун (MSMT) отчетуна шилтеме берилди.
Отчетто айрым түндүк кореялык жумушчулар Орусиядагы дрон заводдорунда иштеп, согушка байланыштуу өндүрүшкө түздөн-түз салым кошуп жатканы айтылды.
Орусияда 15 000ден 30 000ге чейин түндүк кореялыктар иштеп, жылына бир адамга орточо эсеп менен 7500 доллардан киреше табышаары жана Пхеньян режими алардын кирешесинин дээрлик 90 пайызын конфискациялаганы кабарланды.
Отчетто ошондой эле чет өлкөдөгү түндүк кореялык жумушчулар өткөн жылы Пхеньян режими үчүн 800 миллион долларга чейин киреше алып келгени, бул акча өлкөнүн ядролук программаларын каржылоого жумшалганы айтылды.
