Польшанын премьер-министри Дональд Туск европалык лидерлер, Канада жана НАТО боюнча өнөктөштөр менен болгон сүйлөшүүлөрдөн кийин кайрадан пайда болгон дипломатиялык импульска шилтеме жасап, Россиянын Украинадагы согушун токтото турган тынчтык келишимине бир нече жуманын ичинде жетишүүгө мүмкүн экенин айтты.

Туск шейшемби күнү өкмөттүн жыйынында "тынчтыктын жакында орной турганын" айтып, акыркы окуялар чыр-чатактын күтүлгөндөн эртерээк аякташына "дем берүүчү себептерди" сунуштаганын баса белгиледи, бирок ошол эле учурда ийгиликке кепилдиктин жок экенин белгиледи.

Туск : “Жумалар дегенде чындыгында жумалардан сөз кылып жатам, айлар же жылдар эмес!”- деди.

Польшанын премьер-министри АКШнын Киевге берген коопсуздук кепилдиктерин оптимизмдин түрткү берүүчү факторлорунун бири катары белгиледи; ошол эле учурда Украина аймактык маселелерди кошо алганда, оор компромисстерге барууга аргасыз болушу мүмкүн экенин моюнга алды.

Айрым тоскоолдуктарга карабастан тынчтык жакын

Тусктун сөздөрү АКШнын президенти Дональд Трамптын Украинанын президенти Владимир Зеленский менен сүйлөшүүлөрдөн кийин Вашингтон жана Киевдин бир келишимге "абдан жакын" экендигин айтуусу бир убакка туш келди. Бирок, процессте алыи да болсо чечилбеген маселелер бар.

Зеленский Россиянын көзөмөлүндөгү Запорожье атомдук электр станциясын көзөмөлдөө жана Украинанын чыгышындагы Донбасс аймагынын келечеги сүйлөшүүлөрдөгү тоскоолдук жараткан жагдайлар болгонун билдирди.

Кремль Украинаны Россиянын президентинин резиденциясына кол салуу менен айыптап, сүйлөшүү позициясын күчөтөрүн айтты. Киев болсо бул айыптоолорду негизсиз деп атап, тынчтык аракеттерин кечеңдетүүгө багытталганын белгилеп, дооматтарды четке какты.