АКШ Сирияга карата санкцияларды алып салуу чечимин кабыл алды, бул өлкөгө "жаңы башталыш" берүү максатында жасалууда деп билдирди АКШ президенти Дональд Трамп.
Сауд Арабиясынын борбору Эр-Риядда өткөн Перс булуңу жана АКШ саммитинде сүйлөп жатып, Трамп бул чечим Сауд Арабиясынын мураскор ханзаадасы Мухаммед бин Салман жана Түркиянын президенти Режеп Таййип Эрдоган менен сүйлөшүүлөрдөн кийин кабыл алынганын айтты.
“Мухаммед ханзаада жана Түркиянын президенти Эрдоган менен сүйлөшүүлөрдөн кийин, мен Сирияга карата санкцияларды токтотууну буйрук кылдым. Бул аларга жаңы башталыш жана чоң мүмкүнчүлүк берет,” – деп билдирди Трамп.
Түркиянын президенти Эрдоган АКШнын бул чечими тарыхый мааниге ээ экенин белгиледи. Сүйлөшүү учурунда Эрдоган Анкаранын Сириянын туруктуу жана гүлдөгөн мамлекет болушуна, коңшулары менен кызматташып, аларга коркунуч жаратпашына умтулуп жатканын билдирди.
Ошондой эле, Эрдоган Түркиянын Дамасктын террордук топторго, айрыкча ДЕАШка каршы күрөшүнө колдоо көрсөтүүнү улантарын белгиледи. Ал Түркиянын ДЕАШ согушкерлерин кармаган түрмөлөрдү башкарууга жана коопсуздукту камсыздоого жардам берүүгө даяр экенин кошумчалады.
Эр-Риядда экинчи мөөнөттөгү алгачкы мамлекеттик сапары менен жүргөн Трамп акыркы 25 жылда Сирия лидери менен жолуккан биринчи АКШ президенти болду. Трамп жана Ахмед Альшараа Сауд Арабиясындагы Перс булуңу лидерлеринин кеңири жыйынынын алдында кыскача сүйлөшүү өткөрүштү деп билдирди Ак үйдүн өкүлү.
АКШнын мурунку президенти Билл Клинтон 2000-жылы Женевада Башар Асаддын атасы Хафез Асад менен жолуккандан бери эч бир АКШ президенти Сирия лидери менен жолуккан эмес.
Трамп шейшемби күнү Сирияга карата "катуу жана кыйратуучу" Асад доорундагы санкцияларды алып салуу чечимин жарыялады. Бул кадам Түркия жана Сауд Арабиясынын талаптарына жооп катары жасалганын айтты. Бирок бул чечим Израилдин каршылыгына карабай кабыл алынганын кошумчалады.
Трамп Сирия элинин "жаркыраган учурлары" келди деп, санкцияларды жеңилдетүү аларга "чоң мүмкүнчүлүк" берерин белгиледи. Бул кабарды Дамасктын Умайяд аянтында чогулган ондогон адамдар майрамдашты.
Сириянын тышкы иштер министрлиги Трамптын чечимин "маанилүү бурулуш учур" деп атап, бул өлкөгө туруктуулук алып келүүгө жардам берерин билдирди.
Трамптын Жакынкы Чыгыштагы сапары төрт күнгө созулат. Биринчи күнү ал Сауд Арабиясы менен АКШнын ортосундагы $600 миллиарддык инвестициялык келишимдер жана $142 миллиарддык курал сатуу келишимдери менен белгиленди.
Шаршемби күнү Трамп Катарга учуп, ал жерде эмир Шейх Тамим бин Хамад Аль Тани жана башка расмий адамдар менен жолугушат. Катар АКШга жүздөгөн миллиард доллар инвестиция салууну жарыялайт деп күтүлүүдө.
Катардагы сапарынан кийин Трамп бейшемби күнү Абу-Дабиге учуп, БАЭ лидерлери менен жолугушат. Андан соң жума күнү Вашингтонго кайтып келиши күтүлүүдө, бирок ал Түркияга учуп, Орусиянын президенти Владимир Путин жана Украинанын президенти Владимир Зеленский менен жолугушуу мүмкүнчүлүгүн карап жатканын айтты.
