Президент Режеп Таййип Эрдоган менен Түштүк Кореянын президенти Ли Чжэ Мён кызматташтыкты кеңири чөйрөдө чыңдоого багытталган ар тараптуу сүйлөшүүлөрдү өткөрүү үчүн Анкарада жолугушту.
Эрдоган дүйшөмбү күнү лидерлер соода, коргонуу, жасалма интеллект, энергетика, жарым өткөргүчтөр жана башка тармактарды камтыган эки тараптуу карым-катнаштарды талкуулаганын айтты.
Ошондой эле эки тарап плазма технологиясы жаатында өз ара түшүнүшүү меморандумуна кол коюшту.
Эрдоган эки тараптуу соода учурда 10 миллиард доллардан ашканын жана аны 15 миллиард долларга жеткирүү максаттталганын билдирип, Түркиянын өлкөгө инвестиция салууну каалаган түштүк кореялык инвесторлорду толук колдой турганын айтты.
Президент Эрдоган: "Анкара менен Сеул көптөгөн тармактардагы мамилелерин өз ара пайдага негизделген түшүнүктө бекемдей беришет", - деди.
Коргонуу жаатындагы кызматташтыкты эки тараптуу окутуу жана инвестициялар аркылуу тереңдетүүгө болорун баса белгилеген Режеп Таййип Эрдоган: "Тиешелүү мекемелер менен таза электр энергиясы станциясын куруу боюнча сүйлөшүүлөрүбүз да уланууда", - деп айтты.
Эрдоган ийгиликтүү коргонуу кызматташуусу эки өлкөнүн мүмкүнчүлүктөрүн жогорулатып, аймактык тынчтыкка салым кошот деген үмүтүн билдирди.
Президент Эрдоган ошондой эле Түштүк Кореянын Сирия менен дипломатиялык мамилелерди түзүү чечимин кубаттап, мунун "кубандыруучу жагдай" экенин айтты.
Газа маселеси боюнча Эрдоган: «Түркия менен Түштүк Корея Газадагы ок атышпоонун сакталышын, жарандардын өлүмүн алдын алууну жана эки мамлекеттүү чечимди жактайт», — деп билдирди.
Украина темасында Эрдоган Түркия туруктуу тынчтыкты камсыздоого багытталган бардык дипломатиялык аракеттерди, өзгөчө Истанбулдагы сүйлөшүүлөр аркылуу колдоону уланта берерин айтты.
Эрдоган Анкаранын Ирак, Африка жана Борбордук Азия, ошондой эле Сирия, Газа жана Украина сыяктуу көптөгөн аймактарды калыбына келтирүүдө Сеул менен биргеликте иштей алаарына ишенгенин билдирди.
Түштүк Кореянын президенти Ли Чжэ Мён жекшемби күнү өлкөсү жана Түркия «эркиндикти жана демократияны коргоо үчүн жанаша күрөшкөн бир тууган элдер» экенин айткан.
