Ирак Иран менен Сауд Арабиясына "биргелешкен коопсуздук координациялык кеңешин" түзүүнү сунуштаганын жарыялады.

Ирак премьер-министринин коопсуздук боюнча кеңешчиси Касым аль-Аражи расмий мамлекеттик "аль-Иракия" телеканалына берген билдирүүсүндө өз өлкөсүнүн жаңы дипломатиялык демилгеси тууралуу Тегеран менен Эр-Риядга маалымат берди.

Иран менен Сауд Арабиясынын ортосундагы мамилелерге көңүл бурган аль-Аражи: "Биз Иран менен Сауд Арабиясына биргелешкен коопсуздук координациялык кеңешин түзүү боюнча сунуш киргиздик. Эки өлкөнүн ортосундагы негизги көйгөй ишеним кризисинен келип чыгат", - деп билдирди.

Аль-Аражи сунуштун чоо-жайын айткан жок жана бул маселе боюнча Иран же Сауд Арабиясынын бийликтери тарабынан азырынча расмий билдирүү берилген жок.