Кремлдин билдирүүсүнө ылайык, Орусиянын президенти Владимир Путин көп жылдык өнөктөшү Венесуэланын президенти Николас Мадуро менен телефон аркылуу сүйлөшүп, Венесуэланы колдой турганын кайталады.

Бул сүйлөшүү АКШ Венесуэланын жээгинде мунай ташуучу кемени басып алгандан кийин өткөрүлдү, аталган жагдай эки өлкөнүн ортосундагы бир катар талаш-тартыштардын акыркысы болду.

Орусиянын Венесуэла менен жылуу мамилеси бар. Ушул жылдын башында Мадуро өлкөнүн жылдык аскердик парадына катышуу үчүн Москвага барып, Путин менен ар тараптуу өнөктөштүк келишимине кол койгон.

Владимир Путиндин бейшемби күнү телефон аркылуу сүйлөшүү учурунда "Венесуэла элине тилектештигин билдиргени" айтылды.

Ошондой эле билдирүүдө орус лидери "тышкы кысымдын күчөшүнө карабастан Мадуро өкмөтүнүн улуттук кызыкчылыктарды жана эгемендүүлүктү коргоого багытталган саясатын колдой турганын ырастаганы" белгиленди.

Билдирүүгө ылайык, соода-экономика, энергетика, каржы, маданий-гуманитардык жана башка тармактарда биргелешкен долбоорлорду ырааттуу ишке ашыруу боюнча өз ара милдеттенмелер кайрадан тастыкталды.

АКШнын армиясы шаршемби күнү венесуэлалык мунай ташуучу танкерди камап койду. Аскерлер тик учактан танкердин палубасына чыгып кетишти.

Вашингтон Мадурону баңгизат саткан деп айыптоодо, бирок Мадуро бул айыптоону четке кагып, АКШ Венесуэладагы режимди өзгөртүүнү көздөп жатканын, анткени өлкөнүн мунай корунун көптүгүн билдирди.

АКШнын президенти Дональд Трамп Венесуэлага жакын аралыкка согуштук кемелерди жайгаштырды.

Тынч океанынын чыгышы жана Кариб деңизиндеги кемелерге жасалган кеминде 22 чабуулдан 87 адам каза болду.