Жогорку Кеңештин жалпы жыйынында 32 депутаттан турган демилгечи топтун парламентти таркатуу сунушу добушка коюлду.
Мындай сунушту киргизген депутат Улан Примов президенттик жана парламенттик шайлоонун ортосундагы убакыттын аздыгынан жана шайлоо мыйзамдарына киргизилген өзгөртүүлөрдөн улам мындай кадамды сунуштаганын билдирди.
Примов мындай чечим өлкөдөгү саясий системаны бекемдөө жана стабилдүүлүктү камсыз кылуу максатында кабыл алынганын билдирди.
Добуш берүүгө катышкан 89 депутаттын 84ү парламентти таратууну колдоп добуш берди.
Парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитети 23-сентябрдагы 7-мөөнөттөгү парламентти таркатуу сунушун жактырды.
Жогорку Кеңештин төрагасы Нурланбек Тургунбек уулу да демилгечи топтун жүйөсүн негиздүү деп эсептей турганын билдирди.
2025-жылдын аягында мөөнөтү бүтө турган 90 орундуу парламент 2021-жылдагы шайлоодон кийин жетинчи мөөнөтүндө кызматка киришкен.
Парламент тарагандан кийин президент Садыр Жапаров мөөнөтүнөн мурда шайлоо өткөрүү тууралуу жарлыкка кол коюусу күтүлүүдө.
Парламенттик шайлоо жылдын аягында өтүшү күтүлүүдө.
