Түркиянын президенттик аппаратынын коммуникация башкармалыгы президент Эрдогандын жума күнү Ирактын премьер-министри менен эки тараптуу карым - катнаштар, аймактык жана глобалдык окуялар боюнча телефон аркылуу сүйлөшкөнүн жарыялады.
Режеп Таййип Эрдоган Мухаммед Шиа аль-Судани менен болгон сүйлөшүүсүндө Анкара Ирак менен көптөгөн тармактарда, айрыкча соода боюнча карым - катнаштарды чыңдоо үчүн кадамдарды таштоону улантарын билдирди.
Президент ошондой эле терроризмге каршы күрөштө кызматташтыкты күчөтүү эки өлкөгө тең пайда алып келерин баса белгиледи.
Режеп Таййип Эрдогандын 2024-жылдын апрель айында Иракка болгон сапары эки тараптуу мамилелердеги бурулуш жери болду.
Сапардын жүрүшүндө коопсуздук, соода, чек ара аркылуу өтүүчү суулар, айыл чарбасы, маданият жана транспорт сыяктуу тармактарда 27 келишимге жана өз ара түшүнүшүү меморандумуна кол коюлуп, эки тараптуу өнөктөштүктүн укуктук негиздерин бекемдеди.
Эрдогандын сапары учурунда кол коюлган негизги документтердин бири болгон Биргелешкен кызматташтык боюнча стратегиялык алкактык келишимдин негизинде түзүлгөн биргелешкен туруктуу комитеттер аркылуу кызматташтыкты институционалдаштырууда олуттуу ийгиликтерге жетишилди.
Кийинки мезгилде жогорку деңгээлдеги саясий жана техникалык байланыштар дагы да күчөдү.
Ирактын премьер-министри Мухаммед Шиа аль-Суданинин 2025-жылдын май айында Түркияга расмий сапарынын алкагында Жогорку деңгээлдеги стратегиялык кызматташтык кеңешинин алтынчы жыйыны өткөрүлүп, 11 стратегиялык документке кол коюлган.
