Тышкы иштер министри Хакан Фидан Хамас Шура Кеңешинин төрагасы Мухаммед Исмаил Дервишке Израилдин Газадагы палестиналыктарды жерлеринен сүрүп чыгаруу жана оккупацияланган Батыш Шерианы аннексиялоо аракеттери кабыл алынгыс экендигин айтты.
ХАМАС делегациясы Газадагы гуманитардык жардамдын көлөмүнүн жетишсиз экендигин баса белгилеп, ок атышууну токтотуу боюнча сүйлөшүүлөрдө Израилдин катаал позициясын сынга алды.
Фидан Израиль Газадагы элди ачка калтыруу аркылуу геноцид саясатын улантып жатканын айтып, мындай мамиле Биньямин Нетаньяхунун өкмөтү ок атышууну токтотуу боюнча олуттуу аракет кылбай жатканын көрсөткөнүн кошумчалады. Өзгөчө Израилдин ок атышууну токтотуу боюнча сүйлөшүүлөрүн создуктуруп, элди көчүрүүгө мажбурлоону көздөп жаткандыгын белгиледи.
Фидан Түркиянын сүйлөшүүлөрдү улантууга колдоосун кайталап, эл аралык коомчулукта Палестинага колдоонун өсүп жатканын белгиледи. Ал айткандай коомдук пикирдин таасиринен улам барган сайын көп өлкөлөр Палестина мамлекетин таанып жатат жана Израиль эл аралык аренада күн өткөн сайын жалгыздап баратат.
Фидан Түркиянын Палестина доосуна болгон колдоосунун күчтүү бойдон улана тургандыгын баса белгиледи.
Эл аралык коомчулуктун ок атышууну токтотуу чакырыктарын четке каккан Израиль армиясы 2023-жылдын 7-октябрынан бери Газадагы катуу кол салууларын улантууда. Кол салууда 60 миңден ашуун палестиналыкт өлтүрүлдү. Тынымсыз бомбалоо аймакты кыйратып, азык-түлүк тартыштыгына алып келди.
